Mueva version de ‘’Mein Kampf’’, kon la koreksion de las mintiras de Hitler

Mueva  version de ‘’Mein Kampf’’, kon la koreksion de las mintiras de Hitler

El Prezidente del Konsilyo Sentral de los judios de Almanya, se prononsio en favor de una mueva edision del livro  ’Mein Kampf’.  Esta mueva edision va ser aparejada, kon un formato akademiko, i va kontener  kritikas historikas.

Duspues de la Segunda Gerra Mondial, la publikasion del livro Mein Kampf, fue defendida en Almanya. Ma oy, no es komo anyos antes. Los mansevos de oy, pueden topar kualsiker livro ke keren, en el İnternet, en azyendo un solo klik.  Ansi, kon esta mueva edision, los mansevos vana pueder meldar las mintiras, i las terivles teorias de Hitler.

Segun Prof. David Bankier, direktor del İnstituto Enternasional de la İnvestigasion del Holokosto,  esta dizyendo ke, los akademikos, en aparejando esta mueva edision, deven de dar la eksplikasion, i la sinyifikasion de kada biervo de las teorias ekstremistas, i deven de amostrar kon detalyos, kualas partes del livro son mintiras i esuenyos de Hitler.

El Estado Almano de Baviera se esta opozando a esta mueva edision, por espanto ke el livro no kayga en la mano de los ektremistos de la derecha, i tambien no kere inyervar los grupos judios en Almanya.

Segun el Direktor del İnstituto de los İstorianos en Munih,  la mueva edision va ser neseserio para amostrar, komo las ideas de Hitler no eran konsistente (tutarli). El direktor esta ensistiendo en la koreksion de kada linya del livro, por amostrar a los mansevos, la reel kara de Hitler.

El eskritor de una biografia de Hitler, İan Kershaw, en la revista almana Stern, eksprimo la nesesidad de una mueva edision, dizyendo ke, una demokrasia komo Almanya, no deve de espantarse del danyo, i de la menasa de Hitler para los mansevos.

En el livro ‘’Mein Kampf’’, Hitler ekspliko su doktrina politika, sosial, i rasial.  La gerra entre las rasas, el prensipo de Lebenstram, i el problema judio en Almania i en el mundo entero, son los mas emportantes sujetos de este livro de 720 ojas. Kada unos kuantos anyos, este livro sale en medio de muevo, i partikularamente, kuando ay problemas legales por defender la distribusion.

Empesando de la period del pueder de Hitler, fin a la fin de la gerra, miliones de kopias del livro se vendio, i fue traduizado en munchas linguas. Mezmo duspues de la gerra, miliones de kopias del ‘’Nazi Manifesto’’ fueron publikadas. Oy, la publikasion del livro es defendido en paises, komo Almanya, Austria, i Hollanda, ma permetido en munchos paises, komo los Estados Unidos, Fransia, i Suesia.

Unos kuantos anyos antes, un investigator de la historia de Almanya, deklaro ke, Peter Laubel, un enjenior austriano, siendo un heredero (varis) de Hitler, puede reklamar sus derechos finansarios de la vanta del livro, ke aze miliones de euros. Kuando le avlaron de sus derechos legales, el enjenior les respondio ke, la sola koza ke el kere es, ke lo deshen repozado, para pueder bivir una vida repozada.

Oy, Mein Kampf es un ‘best seller’ en el mundo arabo. Partikularamente, duspues de la Segunda İntifada, la vanta del livro pujo. En el anyo 2005, una mueva edision emprimada en Turkiya, fue el best seller de Turkiya, en akoyos diyas. Oy, en Ejipto, en Palestina, i en Lebanon, Mein Kampf es uno de los mas populares livros. En İsrael, antes kinze anyos, unas kuantes partes del livro, fueron publikadas por ‘Akademon Pubilishing House’, kon el titolo ‘Teksos Sovre la Gerra de Adolf Hitler’, i oy, egziste un kopia en las bibliotekas de munchas universidades de İsrael.

Dies anyos antes, el Sentro Wiesental, eksprimo su desgusto sovre la vanta del livro, en los sitios populares del İnternet. Una protesta publika ovligo munchos de estos sitios, de deshar la vanta de ‘Mein Kampf’, ma Amazon kontunio a venderlo.

Segun Prof. Moshe Zucherman, en la Universidad de Tel Aviv, duspues ke el livro va ser korijado por los akedemikos, los İsraelianos deven de publikar una mueva version en İvrit. ‘El boykot es simboliko. Kualsiker lo puede topar fasilamente’ esta diayendo Zucherman. ‘No ay dinguna razon por pensar ke, muevas ideas pueden salir de este livro. Si keres konoser tus enimigos, deves de meldar lo ke estan pensando. Ademas, Mein Kampf es el mas pezgado livro ke meldi fista oy. La sola parte ke me entereso, es la psikolojiya de las masas (kitle). Hitler las analizo muy bueno las masaa, i tuvo unas  profondas ideas sovre este sujeto’.

Prof. Dina Polat, direktora del Estudio del Antisemitizmo en la Universidad de Tel Aviv, no se esta opozando a la mueva edision del livro. Ma, Polat esta dizyendo ke ‘’El sembol de Mein Kampf nunka va trokar, mezmo kon las koreksiones en la mueva edision.  Polat se esta espantando tambien ke, la idea de alevantar la prohibision (yasak) del livro en Almanya, va sirvir lo mas al puevlo alman, ke se keren liberar de la responsabilidad del Holokosto, i echar toda la kulpa i la responsabilidad enriva los ombros de Hitler, en dizyendo ‘Agora estash viendo komo Hitler era un loko?’.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın