El komporto de obama sovre el proseso de pas

El komporto de obama sovre el proseso de pas

Foxman, el Prezidente de ADL, endiko ke el esta ‘profondamente enkiyetado’ sovre el komporto de Obama sovre la politika de İsrael, i sus palavras sovre el proseso de pas.

El mez ke pasimos, los miembros judios de la administrasion de Obama, mos avertisieron de las ideas de Obama sovre İsrael. Agora, esto fue konfirmado por Obama, el propio, en la konferensia de presa, sovre la ‘Sekuridad Nuklear’. Obama esta akuzando İsrael por no kerer rezolvar el Konflikto Palestiniano-İsraeliano.

Foxman kritiko Obama por sus palavras, i endiko ke en lugar de avlar kontra İsrael, la adminisrasion amerikana kale ke forse los palestinianos a deshar sus taktikos de dizir ‘no’ a kada koza, i kale ke el governo amerikano ensiste al mundo arabo de normalizar sus relasiones kon İsrael.

La semana ke pasimos, el Prezidente del Kongreso Mondial, Ronald Lauder, embiyo una karta a Obama, konsejandolo a reevaluar la politika de su governo kon İsrael.  Ronald Lauder, tambien kritiko el governo de Obama, por echar la kulpa entera enriva de İsrael, diziendo ke İsrael no esta tomando kamino en las konversasiones de pas. Lauder endiko ke, es los Palestinianos los ke no keren negosiar, i no İsrael.

Elie Wiesel, el ganador del Premio Nobel, tambien endiko sus ideas sovre ‘Yerushalaim’ en munchas gazetas. ‘Para mi, ke so judio, Yerushalaim viene ensima de todo modo de politika’ disho Wiesel, i ajuto ke en el Viejo Testamento, es mensionado mas de sheshentas vezes ke Yerushalaim apartiene a los judios. ‘Solo debasho del dominio de İsrael, por la primera vez en la istoria, los judios, los kristianos, i los muslumanes puedieron azer sus orasiones libramente en sus templos en Yerushalaim’ ajuto Wiesel.

Wiesel kritiko Obama, en diziendo ke en lugar de akuzar İsrael en todo modo de koza, la administrasion amerikana kale ke bushke remedios ke vana permeter las komunidades israelianas i palestinianas, a topar formas de bivir endjuntos en una atmosfera de seguridad.

Segun Sheldon Schorer, el konsejero de los Demokrates biviendo en la diaspora, endiko ke los sujetos konsernando İsrael  kale ke seygan rezolvados, en primero, entre los reprezantantes de los dos partidos de İsrael, i antes de todo, los dos partidos kale ke esten dakordo sovre kada sujeto, i duspues se vana pueder asentar a la meza de negosiasion kon los palestinianos.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın