La negasıon del holokosto

La negasıon del holokosto

En los anyos dalkavo, los inyegadores del Holokosto estan penando para trokar el rekordo historiko del Holokosto, i ansi keren reushir a provar ke el Holokosto no egzistio del todo. Segun eyos, la reklamasion ke ‘sesh miliones murieron en el Holokosto’ es una mintira i ke los judios envantaron el Holokosto para fasilitar la fondasion del estado judio. El objekto de estos eforsos es de enfuerteser el antisemitizmo, el rasizmo, i el fashizmo.

Por esta razon, los historiadores judios son ovligados de topar evidensias historikas, dokumentos de primera mano, konfesiones de los Nazis, i testimonios de los sorviventes para kontradizir estas mintiras.

Los inyegadores estan reklamando ke no uvo kamaretas de gas en el kampo de eksterminasion. Por tanto, los dokumentos fotografikos son evidensias de estas kamaretas de gas, i estan amostrando la lokalizasion presiza de la kontinual entroduksion de gas a estas kamaretas. Ademas, los burakos en los tejados de las kamaretas de gaz dainda egzisten en Auschwitz-Birkenau.

Una otra mintira es ke Auschwitz-Birkenau nunka fue un sentro de eksterminasion porke las sertifikas de los muertos en Aushwitz, estan amostrando ke uvo solo 69.000 muertos aya, i ke estas personas murieron de kavzas naturales komo aksidentes i hazinuras. Es verdad ke dokumentos de los ombres, mujeres, i kreaturas ke murieron no egziste, porke las viktimas fueron embiyadas direktamente a las kamaretas de gas de Auschwitz, kuando abasharon de los vagones de transporto, i ademas, estos vagones no eran rejistrados.

Segun los inyegadores, no egziste dingun orden sinyado por Adolf Hitler, otorizando la Solusion Final. Por tanto, las konfesiones de los Nazis son evidensias de la Solusion Final sinyada por Adolf Hitler, i de la komplisidad de Hitler en todos los aktos.

Los inyegadores estan reklamando ke los krematoriumes los mas modernos de oy, no pueden kemar mas de un puerpo en una ora. Por esta razon, es emposivle de kemar tantos puerpos kon los ornos de akel tiempo, ke tenian menester reparasiones frekuentamente. Estos mintirozos keren guadrar la realidad ke los otorizados de Auschwitz no tenian dingun respekto a los muertos, i echavan munchos puerpos en una vez a los ornos, i estos puerpos mentenian los ornos kayente, komo lo aziyan los lenyos.

Una otra mintira es ke el diaro de Anne Frank es eskrito por su padre, i ke el lo eskrivio para obtener enteresos ekonomikos.  Por tanto, la eskrituria de Anne Frank es la mezma kon la eskrituria en todas las otras kozas estkritas por Anne Frank.

Segun los inyegadores, Hitler no es responsivle de Kristallnacht porke el se ambezo todo lo ke afito akeya noche mas duspues. Por tanto, en las konfesiones de los Nazis esta eskrito ke Hitler dio todos los ordenes de akeya noche, i todas las preparasiones de Kristallnacht fueron echas por Hitler.

Estas son solo unas kuantas reklamasiones envantadas por los inyegadores. Kada diya, estan kitando muevas mintiras i estan penando a provarlas kon instrumentos sientifikos.

Por esta razon, mezmo los sorviventes ke fin oy no kijeron avlar sovre el Holokosto, agora deven de kontar todo lo ke saven, i lo deven de azer por el bien de sus ijos, de sus inyetos, i por el bien de las futures jenerasiones. Estos testemonios ke vana ser filmados komo lo izo Spielberg, mos va dar la oportunidad de oyer las istorias de primera mano. En este momento ke la inyegasion del Holokosto esta kresiendo, testemonios personales son los instrumentos los mas esansieles para provar la realidad del rekordo hostoriko del Holokosto.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın