LA HAGGADA de los Judios Etopıanos

LA HAGGADA de los Judios Etopıanos

Segun un artikolo ke meldi en Jerusalem Post, la Haggada de los judios etopianos se eskrivio este anyo. Rabbi Menahem Waldman ke es un eksperto en la istoria de los judios etopianos,  por la primera vez en la istoria, eskrivio la Haggada de este puevlo kon sus tradisiones i sus kostumbres.

Esta Haggada de 195 pajinas, fue traduizada del amarik (la lingua semitik de los etopianos) al ebreo. En este livro, Waldman eskrivio sovre la istoria del egzodus de los judios etopianos, i la istoria de la emigrasion de la komunidad Beta de Etopia a İsrael, kon la Operasion Moses en 1984-1985, i kon la Operasion Salomon en 1991.

En esta Haggada, puedemos topar tambien fotografias i eksplikasiones de Pessah, kon detalios de las tradisiones i de los kostumbres judios.

El direktor del İnstituto de Shvut, Waldman, esta diziendo ke el eskrivio munchos livros sovre los judios etopianos, i ke el vijito munchas vezes sus paiz, ma ke esta es la primera vez ke la istoria de la komunidad judia etopiana fue eskrita, i ke se va meldar en la meza de Seder.

‘El objekto ke me izo eskrivir este livro’ esta diziendo el eskridor, ‘es para amostrar a la opinion publika israeliana, ke esta komunidad tiene una istoria muy larga i profonda atada al judaizmo’.

‘Munchas vezes pensamos ke los judios etopianos ke emigraron a İsrael, no tienen dinguna koneksion kon el judaizmo, i ke por esta razon, pensamos ke tienen menester de ambezarsen el judaizmo’ disho Waldman. El eskridor esta desidado de gerreyar kon esta opinion de los israelianos, provarles los raizes judios de los etopianos, i de esta manera, pueder ganar la permision del governo a trayer a İsrael, los miles de Falashas ke fueron konvertidos kon fuersa al kristianizmo.

Segun Waldman, los judios etopianos tienen raizes judios, ma eyos selebran la fiesta de Pessah a sus manera. La forma de la selebrasion es diferente de la muestra, ma tambien es Pessah.

El eskridor ekspliko ke este puevlo konta la istoria de Pessah segun sus version del Seder, i ke sus tekstos de Pessah no son komo la version prinsipal de la Haggada muestra, porke los judios etopianos fueron separados del judaizmo talmudiko. Munchas vezes Waldman peno a azerles akseptar la lektura del teksto akseptado por todos los judios, ma no reusho, porke la komunidad etopiana kere selebrar el Pessah a sus propria manera.

Aviad Mozes, el direktor de la editores de Koren ke publikaron esta mueva Haggada, esta diziendo ke el objektivo de este livro es eksplikar a los israelianos las tradisiones i la estoria de este puevlo. Este anyo solo la edision en ebreo de este livro va ser pronta, ma fin al Pessah del anyo 2011, tambien la edision en inglez va ser aparejada.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın