La ekspozision de Marc Chagall en el Muzeo de Pera

La ekspozision de Marc Chagall en el Muzeo de Pera

El vente i tres del mez Oktober, la Fondasion Suna İnan Kıraç, inoguro una ekspozision de Marc Chagall.

Marc Chagall es un maestro de diferentes ovras de arte, eskulturas, pinturas, mozaikos, tapedes de pared i dekorasiones.

El se entereso tambien en la literatura, i eskrivio poezias i eskriturias sovre diferentes sujetos.. Por aparejar esta ekspozision, la fondasion Suna İnan Kiraç, izo trayer del Muzeo de İsrael, sien i sesenta ovras de la koleksion de las ovras de Chagall.

En esta ekspozision, nombrada komo ‘Vida i Amor’, los sujetos de las ovras son lo mas, rekuerdos de la chıkes de Chagall, fiestas judias (Rosh Hashana, Kipur, Sukot, Purim i Shabbat), figuras de ombre i mujer abrasados i bolando de alegriya, komplimientos de anyos, i paseyos.

En su tema ‘Mi Vida’, Chagall reflekto sus rekuerdos, su amor por su mujer Bella, la triste istoria de la vida judia, illustrasiones de la Torah, i illustrasiones de las ovras de La Fontaine i de Gogol.

Aunke Chagall kreo su estilo uniko i produizo ovras unikas utilizando kolores vivantes, i preto i blanko, el fue tambien empresionado de diferentes muvimientos de arte, komo kubizmo i surrealizmo.

En una programa de televizion ke Chagall partisipo en el anyo 1959, el artisto disho ‘Solo la amor me enteresa, i miro a tener relasiones kon persones ke kero bien’. Ma, si echamos un ojo a la vida de Chagall, arastandose de un pais a el otro, puedemos dizir ke, el no tuvo una vida tan vivante komo sus ovras.

En la epoka de los Nazis, sus ovras fueron abashadas, una a una, de las paredes de los muzeos de la Evropa. En akeya epoka, Chagall fue ovligado a fuyirse a los Estados Unidos. Ma, aunke el sufriyo tanto, el artisto reflekto sus sentimentos optimistos en su ovra ‘Cross’ en el anyo 1944. La tristeza i las amarguras de la vida de Chagall, no lo izieron abandonar su esprito de optimizmo.

Una sonriza aparese en las karas de las personas, en mirando a las ovras alegres de Chagall. Figuras de violonistos, kazalinos, namorados bolandosen en el ayre, rozas, personas kon kavesas de pasharo, gayos kantando, aznos i personas mirandosen ojos kon ojos, son unas kuantas de las temas de Chagall.

Las kolores vivantes ke el artisto empleyo, estan reflektando una vida modesta, yena de pas, i de alegriya.

La ekspozision de este artisto universal, ke reanimo en sus ovras la kultura judiya i la sivilizasion de toda la umanidad, va ser muy signifikante en el anyo 2010 por Estambol, ke fue eskojida komo ‘La Kapital de la Kultura Evropeena’.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın