El resumen del deskorso de Obama en Kairo i los komanterios sovre este deskorso

El resumen del deskorso de Obama en Kairo i los komanterios sovre este deskorso

‘Mos reunimos en un tiempo de tansion entre los Estados Unidos i los muslumanes de todo el mundo. Yo vine aki, para bushkar un muevo empesijo bazado en el entereso de las dos partes. Esto konvensido ke, para pueder tomar kamino, devemos de dizir aviertamente las kozas ke tenemos en muestros korasones’.

‘Yo so kristiano ma mi padre es vinido de una famiya de Kenya ke fueron muslumanes al largo de munchas jenerasyones. Kuando yo era chiko, pasi anyos en Endonezya, oyendo el Namaz de la mishkita en la magrugada de demanyana i en la tadre’.

‘Mezmo ke kero union kon los muslumanes, yo kreygo tambien ke es mi responsabilidad de gerreyar kon los estereotipos violantes ke menasan muestra seguridad. Siguro ke siempre vamos a ser kontra la djente terorista de kualsiker relijion ke seyga; la djente ke matan  los inosantes’.

‘Komo Prezidente, es mi primer dover de protejar el puevlo de los Estados Unidos. Al Kaida mato kaje tres mil personas en el onze de Septembre. El onze de Septembre fue una grande travma en muestro pais. El espanto i el inyervo de mi puevlo era kompreansivle, i fue el kavzo de mos izer olvidar muestros ideales. Mas de siete anyos suivimos de serka las aktividades de El Kaida i de Taliban, kon el soporto enternasyonal. No lo izimos por muestra voluntad, ma lo izimos por muestra nesesidad’.

‘Vinyendo al problema del Medio Oriente, la sola solusion es de tener dos estados por ke los İsraelianos i los Palestinianos, kada uno, pueda bivir en pas i en sekuridad. Los İsraelianos deven de rekonoser el fakto ke, komo İsrael tiene el derecho de egzistir, Palestina tiene el mezmo derecho tambien. Los Estados Unidos no esta akseptando la kontinuasion de los asentamientos (yerlesim birimleri) İsraelianos. Estas konstruksiones estan violando los akordos enteriores i los esforsos para pueder topar un remedio de pas. Penso ke ya vino la ora de dar fin a estos asentamientos’.

‘No esto akseptando la opinion de la djente del Oksidente,dizyendo ke ‘la mujer ke se serra la kavesa es manko igual’. La mujer ke inyega la edukasion inyega la kalidad tambien’.

‘Es mas fasil de empesar gerras, ke de eskapar gerras. Es mas fasil de echar la kulpa enriva de otros, ke de akseptar su kulpa. Es mas fasil de ver las diferensias entre las personas, ke de topar las kozas mutuales (musterek). Ma, devemos de topar el kamino derecho, no solo el kamino fasil’.

Las observasiones de munchas gazetas israelianas enterpretaron el mesaje de Obama komo un trokamiento klaro, en las relasiones entre İsrael i los Estados Unidos, i probablamente la fin de una relasion espesial.

Un gazetero se adreso al governo israeliano en dizyendo ke kale ke se adaptan a los muevos ayres ke estan asoplando de Washington. Ma otros gazeteros eskrivieron ke Obama dio un sinyal al governo israeliano, de empesar a pensar a akuerdos realistos, para pueder alkansar la pas kon los Palestinianos’.

Un otro gazetero enterpreto las palavras de Obama, komo un mesaje a Natanyahu de reformar su kabineto.

Munchos gazeteros israelianos eskrivieron ke las palavras de Obama fueron muy pozitivas, ma i munchos otros toparon su mesaje a İsrael muy indinyo (asagilayici).

Un gazetero de la gazeta Yediot Aharonot, eskrivio ke, segun Obama, el solo obstaklo de la pas es los asentamientos,i ke estos asentamientos son responsavles del konflikto arabo-israeliano. Este gazetero se adreso a Obama, en dizyendo ke no se olvide el resultado ke afito duspues ke se destruizo los asentamientos en Gazza.

Segun un otro gazetero, los İsraelianos deven de apresiar los esfuersos de Obama para su empesijo de bushkar una solusion a este konflikto viejo. Segun este gazetero, Obama no es naif, el ya save ke dainda ay muncho tiempo para arivar a una pas kontinual.

Siguramente, el dezeyo de todos es ke se tope una solusion satisfaktora por las partes en el Medio Oriente, i ke esta solusion seyga bazada en el entereso de las dos partes. Lo ke rogamos es, de agora endelantre ke no se muera dingun inosante, i ke no ayga mas dinguna gerra en el Medio Oriente.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın