El Seder kon la Partisipasion de Barack Obama en la kaza blanka

Dora NİYEGO Judeo-Espanyol
15 Nisan 2009 Çarşamba

 

La segunda noche de Pessah, el Prezidente de los Estados Unidos, Barack Obama  selebro la fiesta de Pessah, kon sus fonksionarios i sus amigos, en la Kaza Blanka. Este fue el primer Seder en la Kaza Blanka, kon la partisipasion de un Prezidente Amerikano.

George W. Bush i Bill Clinton aviyan proklamado selebrasiones al onor de Pessah, ma estos dos Prezidentes no aviyan asistido al Seder.

William Daroff, el Prezidente de las Komunidades  Judias, se akodro ke Franklin D. Roosevelt, aviya  serrado las puertas de la Kaza Blanka en el anyo 1943, para no ver  los rabinos ke le estavan rogando  de azer su pueder,  para pueder salvar los judios evropeanos de las manos de los Nazis.  ‘Sesenta anyos duspues de este akto feyo, un Prezidente Amerikano esta  pasando el Pesah, kon sus amigos i su famiya, para selebrar la liberasion i la kontinuasion del puevlo judio’ esta dizyendo Daroff,  i esta ajutando ke ‘los judios son un komponante emportante del mozaiko  de la kultura i de la sosiedad amerikana’.

‘Akeya noche, los judios fueron resividos de la puerta prensipala de la Kaza Blanka por la parte de Obama, kon una bienvenida muy kayente. Este resivido es la prova de la emportansa de los judjios en el Estado Amerikano, i en los ojos del prezidente. Komo dize en la Agada, de verdad ke esta noche fue muy diferente de las otras noches.

En el mesaje de Pessah del  prezidente a los Amerikanos, Obama deskrivio la istoria de los judios  kon estos biervos: ‘La istoria de los judios ke es la salvasion de un puevlo, del esklavaje a la libertad i la yegada de este puevlo a la Tierra de İsrael duspues tantas difikultades, es una de las mas puederozas istorias de la sufransa i de salvasion, en la istoria de la umanidad’.  Enriva de la karta de suetos, Obama metio semboles de la ermozura de la libertad.  Obama  endiko en su letra ke esta fiesta es tambien, un mesaje a toda la umanidad : ‘Siendo parte de una komunidad mondial, todos devemos de lavorar para garantizar ke muestros ermanos i ermanas de kada rasa, kada relijion, kada kultura i kada nasionalidad, seygan liberos de todo modo de restriksiones,  i de todo modo de presion, i ansi ke puedan bivir en pas’.

Aunke Pessah empeso mierkoles la noche,  Obama prefero de azer el Seder, la segunda noche de Pessah, porke los envitados puedan selebrar la fiesta, la primera noche, kon sus famiyas.

En la lista de envitados, estava eskrito tambien el nombre del Prezidente, de la Primera Damma Michelle Obama, i los nombres de sus ijas, Malia i Sasha, ansi ke los nombres de los dodje fonksionarios, de los amigos de Obama, todos kon sus famiyas.

La Kaza Blanka disho ke el menu de la noche konsistio de las komidas tradisionales de Seder, siendo matza, yervas amargas, uevo kocho i verduras.  Antes de komer, se meldo la Agada, i tambien teksos relijiozos de Pessah.

Kon este jesto, Obama les kijo amostrar a los Amerikanos, ke la Kaza Blanka siempre va ser avierta a todas las komunidades relijiozas de los Estados Unidos.