Alüminyum Hurda Geri Dönüşüm

EL KANTON DEL ARTE / Una artista de “Patchwork”: Eti Koen

EL KANTON DEL ARTE / Una artista de “Patchwork”: Eti Koen

Komo desde unos, kuantos anyos, en el 2 del Septembre 2007, igual ke en 30 paises Evropeos, se selebro en Estambol el “Diya Evropeo de la Kultura Djudia”. En el kuadro de estas selebrasyones se organizo konferensyas, dansas, konsertos, reportajes i diversas ekspozisyones. Apenas ke arrivi a la Kula, por empesar me aviya ido direktamente al “Sentro Kultural Neve-Shalom”, ande keriya ver una de estas ekspozisyones: los lavoros de “Pathwork” de Eti Koen.

Kualo es patchwork?... En turko “kırk yama” (kuarenta aremendos) o mas akoruto, “yamalı bohcha” (bogo aremendado)... Devo adjustar ke seya la una, seya la otra de estas definisyones se pueden aplikar solamente a los lavoros klasikos, standardos de patchwork. Munchas manos kapaches pueden mas o menos reushir a azer kolchas, manteles ets.. Ma, lo ke realizo Eti, i esta kontinuando a realizar, no tyene dingun dar i aver kon esta lavoro standart de patchwork.

Lo ke esta azyendo Eti, no asemeja a eskrivir, ni a brodar o mizmo ni a pintar. Es un lavoro minusyozo, nesesitando oras de pasensya, al lado de un sentimyento “inné” de artista. Egzaktamente, komo diziyan muestras madres: “Bendichas manos!”... A la verdad dezir, no era la primera vez ke estava admirando un lavoro de Eti Koen. Par azardo, ya la aviya enkontrado unos, kuantos diyas mas antes. İ djustamente me amostro akel diya un eshantiyon de su lavoro, ke me enkanto kon su fineza. Tanto, ke kije azer un reportaje kon eya. Eti no es enteramente ajena para mi. Yo konosi sus paryentes ke eran amigos de los miyos, desde mi chikes. Eramos vizinos tambien, en Laleli Cheshme, en el Kal de los Frankos, los anyos 40. İ en el korso de los anyos, mos estuvimos enkontrando...

Eti se ambezo el patchwork klasiko, en un kurso, empesijo de los anyos 1990. Eya, tenyendo un entereso, una pasyon para el “Stil Otomano”, prefero alesharse del patchwork klasik. En el anyo 1998, se dirijo verso las Miniaturas Otomanas, ke eskojyo komo sujeto prinsipal. Sus lavoros fueron prezentados en diversas ekspozisyones aki i afuera.

Desde 2003, Eti esta kontinuando a sus lavoros de patchwork, en la atelye, djuntos kon tres amigas. Me informi ke uzavan a dar i lesones de patchwork ayi. Entonses estan solo azyendo los lavoros. No fue kismet de azer algun reportaje kon Eti akel Otonyo 2007. Me aviya ambezado ke muestra amiga Esti Saul iva eskrivir en su oja de Arte de “El Amaneser”, sovre Eti Koen (*).  Alora, lo remeti este proyekto miyo. Komo ya lo eksprimi en mis tekstos presedentes, en este muevo kanton miyo, no se trata de entrevistas. Solamente le demandi a Eti syertas informasyones sovre sus proyektos ets...

Ya se ke Eti estava preparando un proyekto komun kon su ija Renan Koen Albukrek, ke konosi tambien. Asigun me disho Eti, este proyekto esta en el estado de realizasyon en serka. Entendi ke no me kijo dar muncho mas detalyos, i tiene muncha razon. No insisti naturalmente. İ yo tambien tengo mi proyekto ke es, azer en serka un teksto sovre Renan Koen, eya tambien, una artista kumplida.

(*)- “El Amaneser” No. 32

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın