Las selebrasyones de Tu-Bishvat en la Sinagoga Hemdat İsrael de Kadıköy

Dora NİYEGO Judeo-Espanyol
11 Şubat 2009 Çarşamba

Fotografias: Rubi ASA

Komo kada anyo, i este anyo, en el mueve de Febrero (Shevat), la fiesta de Tu Bishvat se selebro en la Sinagoga Hemdat İsrael de Kadikoy, kon la partisipasyon del Grande Rabino İzak Haleva i el Prezidente de muestra komunidad, Silvyo Ovadya.

El Konsul de İsrael, Moshe Amiray, el vice prezidente de la komunidad, Robert Abudara, los dirijentes de la komunidad, los prezidentes de las institusyones, de las asosiasyones i los miembros de muestra komunidad, asistieron a esta selebrasion.

Los mansevos del Koro del Talmud Tora de Caddebostan, aresivyeron al Grande Prezidente kon la kantika Baruch Aba (Bienvenida).

El primer enterlokutor, el Prezidente de la Fondasion de la Sinagoga Hemdat İsrael, Mordo Kumrulukus, en su deskorso de Bienvenida, mos avlo de muestros eforsos por ensembrar ermozas plantas (muestras kreaturas) porke se developen, se ambezen a sustenersen unos kon otros, a bivir kon amistad i pas, i ansi pueder sumeter muestras komunidades en manos mansevas i rezyas.

La ovra de teatro ke las kreaturas de Talmud Tora prezantaron, fue muy gustada por los partisipantes. La ijika ke djugo el rolo del arvole konsejo las kreaturas dr atarsen a sus tradisyones komo se atan los arvoles a sus raizes.

Los elevos de Talmud Tora meldaron del Tefillim, los pasajes ke amostran la sinyifikasyon i la emportansa de la fiesta.

El Prezidente de Talmud Tora, İzak Babat, tomo la palavra. Babat konsejo los padres i madres de edukar bueno sus kreaturas para ke se puedan estar empies komo los arvoles, i ke puedan dar frutas ermozas. Babat mos avlo tambien del muevo projekto de Talmud Tora. Empesando oy, kada Shabat, en la Tefilla, vana envitar los mansevos padres i madres, kon sus ijos i les vana dar apoyo, para ke los puedan aparejar mas puederozos paral futuro.

Rav Yuda Leon Adoni, mos avlo de la sinyifikasion de la fiesta de Tu Bishvat i de muestra alegriya de pueder selebrar esta fiesta tradisyonal en la mezma Sinagoga komo kada anyo. Kuando ayegimos a las tierras de Kenan,  el Dio mos disho ke no devemos kortar dingun arvole ke El kriyo, porke kortar un arvole es komo matar una persona. Los arvoles son komo pedagoges ke mos ambezan komo engrandeser i edukar muestras kreaturas. Los arvoles toman sus fuersas de sus raizes i ansi no se derrokan en la mas grande tampesta. De la mezma manera, las personas ke tienen kreensia i dan emportansa a valores morales, tienen la fuersa de gerreyar kon todas las difikultades ke se rankontran en la vida. Las personas ke son buenas edukadas i ke tienen otokontrol, tienen buenas kalitades i se pueden liberarsen de todo modo de defektos, djusto komo se echa las kashkaras de las frutas antes de komerlas.

El koro de las kreaturas de las Estreyikas d’Estanbol en la direksion de İzzet Bana, mos kanto sesh kantikas, siendo tres en judeo-espanyol i tres en ebreo. La kantika ‘Ke Lo Bueno de Savor’ ke gano el segundo premio en el festival Festo Ladino, fue aplodisada kon grande alegriya.

El Prezidente de muestra komunidad Silvyo Ovadya, empeso su deskorso en ogurandomos una ermoza fiesta. En esta ermoza Sinagoga ke fue reparada este anyo, estomos alegres de pueder fiestar el Tu Bishvat todos endjuntos, mezmo en estos diyas ke muestra komunidad esta pasando diyas difisiles. Rogamos de pueder fiestar muestras fiestas kon mas grande alegriya, repozo i pas en el futuro. Ovadya remersio İzzet Bana por sus eforsos de transferar el judeo- espanyol a las kreaturas. Las difikultades ekonomikas no deven de aretar la edukasyon de universitad de los mansevos. Muestra komunidad esta azyendo todo su posivle para pueder kreyar oportunidades por la edukasyon de los mansevos. Ovadya remersio tambien los dirijentes de Talmud Tora por sus eforsos por pueder arivar a todas las kreaturas de muestra komunidad i darles la edukasion djudiya.

Duspues ke el koro de Maftirim mos kanto tres imnos en ebreo i en judeo-espanyol, el Grande Rabino tomo la palavra i ampeso su deskorso kon una Beraha, remersiando el Dio por todas sus kreyansias. Tu Bishvat es el empesijo de la primavera. Komo todas las ojas de los arvoles toman sus fuersas de sus raizes, las personas tambien toman sus enerjias de sus tradisyones.

En estos diyas difisiles ke estomos pasando, la Sinagoga no va ser mas solo un lugar de relijion, ma va ser tambien el lugar ande mos vamos a reunir, vamos a vinir kontra las fuersas ke mos keren destruirmos, i vamos a tomar fuersa del Dio para pueder gerreyar kon todo. Rogaremos ke la ekonomika se endereche i ke empesen de muevo, los diyas ermozos de alegriya, repozo i pas.

Duspues ke se avyo el Ehal Akodesh i todos endjuntos dishimos la priyera Anoten, el Grande Rabino, el Prezidente de la Komunidad, el Konsul de İsrael i los dirijentes de ka komunidad salyeron a la guera para ensembrar un arvole muevo komo kada anyo.

Rogamos ke el Dio mos de repozo i alegriya para pueder fiestar el Tu Bishvat kada anyo.