Duspues de mas de sesenta anyos de kayades, los violones del Holokosto sonaron en Yerushalayim

Duspues de mas de sesenta anyos de kayades, los violones del Holokosto sonaron en Yerushalayim

Mas de sesenta anyos duspues de la fin de la Segunda Gerra Mondial,  los violones ke fueron topados en los kampos de konsantrasion i en los gettos en la Evropa, fueron reparados. Las semanas ke pasimos estos violones tornaron a la sena para un konserto en Yerushalaim.

El 24 de Septembre, diya de Mierkoles, en los piezes de las viejas paredes de Yerushalaim, los artistos de İsrael i de la Turkiya dieron un konserto kon estos violones. Este evento de bienfezensia fue nombrado komo ‘’Los Violones de Esperansa’’. El program fue bazado en las kompozisiones de Felix Mendelssohn, de Maurice Ravel i una kompozision espesial bazada en la melodia de la orasion tradisional ‘Avinu Malkenu’.

En la direksion de Omer Welber, la Orkestra Flarmonika de Estambol i la Orkestra Semfonika de Ra’anana, akompanyadas por los virtiozos İsraelianos Shlomo Mintz, Yair Dalal i el virttiozo Turko Cihat Askin, djugaron los violones del Holokosto.

Este konserto fue una parte de las selebrasiones del aniverserio del sesenten anyo de İsrael. La ganansia de este konserto se dio a Panim Layeled Meir, ke es una organizasion de bienfezanza por la edukasion i los menesteres de salud de las kreaturas de İsrael.

Kada uno de estos diisesh violones tiene una estoria. Unos fueron empleyados para salvar vidas djudias, otros para gerreyar kontra los Almanes.

El reparador de violones Amnon Weinstein ke tiene 69 anyos, disho ke el reparo munchos violones arekojidos de toda la Evropa. Munchos de estos violones teniyan la Estreya de David enriva, ke es la testimonia de sus proprietarios djudios. ‘En reparando estos violones, las erensias de los violonistos nasieron de muevo’ esta diziendo Weinstein. Wienstein ke perio su famiya en el Holokosto, se entereso muncho kon las estorias de estos violones. ‘Munchos de estos violones fueron topados debasho los tejados, debasho la tierra, ande pasaron anyos i anyos, enteros empolvados. Los Nazis en los kampos de konsantrasiones formavan orkestras empleyando violonistos djudios'. Munchas vezes, Weinstein solvo las estorias de estos violones i se fue a avlar kon las famiyas de los violonistos.

Uno de estos violones aparteniya a un ijiko de dodje anyos ke djugava este violon por los SS Nazis en Bielorrusia en el anyo 1944. El nombre de este ijiko era Motele. Motele tomo parte en un grupo de Resistensia, en un vilajio serka la frontiera de la Ukrania i reusho a eksplozar un edifisio de los Nazis.

‘Un diya los Nazis lo oyeron djugar el violon en las kayes i lo yamaron para ke djuge por eyos kada noche’ esta dizyendo el ijo de un violonisto ke era el amigo de Motele. ‘Kada noche, en tornando de su lavoro komo violonisto, Motele guadrava su violon en este edifisio i saliya afuera kon la kasha del violon vaziya. A la otra noche, Motele entrava al edifisio demuevo kon la kasha yena de eksplosivos i estos ekplozivos los enkashava entre las paredes’.

Un sierto tiempo duspues, Motele fue asasinado por los Almanes. La famiya de su amigo Hanegbi, lo trusho este violon a İsrael.  El violon estuvo guadrado anyos i anyos en el kashon de un almario, olvidado aya fin ke Amnon lo izo reparar i lo torno en vida.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın