Los Kreadores de Superman son dos mansevos Judios

Dora NİYEGO Judeo-Espanyol
9 Temmuz 2008 Çarşamba

Los dos kreadores de Superman son dos mansevos judios, Jerry Siegel i Joe Shuster. Superman es una persona superior ke vino a la Tierrade una planeta muy leshos. Todos se espantan de el; el kere dominar el mundo entero. Puede ser ke, Jerry Siegel i Joe Shuster kijeron krear un karakter judio, Superman, justo komo ‘’la rasa superior’’ ke Hitler kijo krear. Probablamente, estos dos mansevos kijeron topar moral en kreando una persona judia, teniendo fuersas superiores para pueder protejar todos los judios de sus enimigos.El viaje de Superman, de Kripton a la Tierra, es el kuento de la salvasion de una kreatura, embiyada de su mundo a una otra planeta, por ke no se muera en el tumulto. El padre esta dizyendo a su ijo, ke el lo embiyo a la Tierra, para ke salve las personas desgrasiadas, de los injustos. La istoria de Superman es, tambien, la istoria de Moshe Rabeno, embiyado a Ejipto por su padre i su madre en una barka, para ke salve de la muerte. Moshe fue engrandesido entre personas etranjeras de el. La djente no se supsonaron de su identidad sekreta, asta ke el, se konvertiso en un liberador de los oprimidos (ezilmiş), i utilizando sus fuersas superiores los salvo de la muerte.Si miramos a la data de la kreasion de Superman, (en los 1940s), una otra sinyifikasion de Krypton, puede ser la Tierra Vieja.

La Tierra Vieja, (aki, sinyifiando la Evropa , a punto de ser destruida), i la sinyifikasion de la Tierra Mueva puede ser el Mundo Muevo, ke era, akeyos diyas, la Amerika, kon su promesa de una vida mueva por los judios. Los nombres del padre i de la madre de Superman en Kripton, eran Eben i Sarah, nombres tomados de la Torah.

Un otro superkarakter de la estoria judia es Golem. Golem fue kreado de la arsiya (kil) por el Rabbi Judah Loew, en el disejien siglo en Prag, por protejar la komunita judia. Gomel tiene la figura de una persona, ma el no puede avlar. El Rabbi lo metio en vida, en eskriviendo el biervo ‘’emeth’’ (verdad en ebreo) en su frente. Todos los superheros de los filmos animados tienen el empesijo en Golem, el super karakter ke vino al mundo por topar ‘’justisia’’. Este salvador, Golem, fue la inspirasion de todos los kreadores de los super karakteres. Mirando a esto, puedemos dizir ke, kada vez ke los Judios estan en difikulta, eyos estan esperando ke venga un salvador.

Kada artisto bushka partidarios para ekspender (yaymak) su ideolojia.. Por pueder azer esto, el artisto, si es posivle, utiliza su kultura. Los primeros kreadores de los filmos animados fueron los judios. Mezmo oy, los kreadores de los muevos superheros, komo ‘’Batman’’, ‘’The Escapist’’ son judios. Tambien, los primeros eskridores, los primeros karikaturistos fueron los judios. Si miramos al İnternet, vemes ke munchos de eyos, tuvieron menester, mezmo de trokar sus nombres. El arte es otra koza, la nosion detras del arte es otro. Es natural ke el artisto va utilizar su kultura i su relijion, para krear muevas ovras.

En resumen, si pensamos komo de grande plazer toman las kreaturas, (i mezmo los adultos) en meldando los livros de ‘’Superman’’, ‘’Batman’’, ‘’The Escapist’’ etc., i en viendo sus filmos, dagora en delantre, todos pueden dizir ‘’Shalom’’.