El diya de komemorasion del Holokosto

El diya de komemorasion del Holokosto

Diya de Djueves, el 27 de Enero, a las diez de demanyana, una sirena de dos puntos marko el empesijo del diya de Yom HaShoah, en İsrael. Los İsraelianos, en el pais entero, desharon sus echos por un momento de silensio, por la memoria de los sesh milion djudyos, matados por los Nazis, en el Holokosto. Los konduktores aretaron sus vuatures en medio de las kalejas, i los petones se aretaron de kaminar.

En el Knesset, los nombres de las viktimas fueron meldados, kon boz alta. Se metio rozas delantre del monumento del ‘Revolto del Ghetto de Warsaw’, en Yad Vashem. Seremonias nasionales empesaron en Yad Vahem, mierkoles la noche. Un sorvivente asendio la flama del Holokosto. Sesh kandelas fueron asendidas por la memoria de los sesh miliones ke murieron en el Holokosto. Oy, 270.000 sorviventes biven en İsrael, 80.000 de eyos son los ke son salvados de los kampos de eksterminio de los Nazis.

Lugares de entretenimiento, komo teatros, sinemas i bares, fueron serrados akel diya. Estasiones de televizion i programes de radio,se konsantraron solo en la komemorasion del Holokosto.

El Prezidente de İsrael, Shimon Peres, avlo en Yad Vashem, i komparo el peligro del programa nukleer de İran, kon el Holokosto. ‘En la istoria, es enterdido de kedar tadre’ disho Peres, akodrandomos de la reaksion tadre de los otros estados a Adolf Hitler, i a la Almanya de los Nazis. ‘Mi korason me se esta apretando, en pensando de la posibilidad ke Hitler puediya empleyar armas nukleeras. Si un lider, komo el de İran, tiene planos de destruir personas kon armas de destruksion, ke puede kedar atras de muestro mundo?’

El Primer Ministro de İsrael, Ehud Olmert, tambien, avlo de İran en su deskorso, en Yad Vashem. ‘Muestros enemigos no keren akseptar el derecho de la egzistensia de İsrael, i se estan kreendo ke el Estado Djudyo se kreo solo por el Holokosto. El Holokosto, solo mos amostro  la nesesidad de la kreasion de İsrael lo mas presto posivle. Esta trajediya mos amostro ke el puevlo djudyo va pagar un presio orivle, si no tiene un estado ke los va protejar’.

Otros enterlokutores, en Yad Vashem, ensistieron en la emportansa de las Fuersas de Defansa de İsrael, i de las Fuersas Militarias, para evitar otras trajediyas komo el Holokosto.

El Shef del Personel Militar de İsrael, Jeneral Gabi Ashkenazi, dirijo la marsha anual de los mansevos djudyos, i de los sorviventes de Aushwitz-Birkenau, en Polonia, en una seremonia memorial nombrada komo ‘La Marcha de la Vida’. Dodje mil personas, de sukuenta i dos paizes se reunieron para partisipar a la seremonia komemorativa. Segun Ashkenazi, ‘En estos diyas ke estamos selebrando los sesenta anyos de endependensia, estomos dainda oyendo, las bozes orivles de los ke keren ver la destruksion de muestro estado. Mezmo oy en diya, dianda estomos ovligados a gerreyar por muestro derecho de tener un lugar nasyonal, komo un lugar seguro por el puevlo djudyo. Mos ambezimos muy buena la lisyon del Holokosto. Estomos tomando muy seriozo las menasas de los dirijentes de los estados ke keren destruirmos.

En su deklarasion, el Sekreterio Jeneral de las Nasiones Unidas, Ban Ki-moon, disho ke kale egzaminar deke el mundo no puido aretar el Holokosto. Durante el Holokosto, kaje un tersio del puevlo djudyo, i otras minoridades, sufrieron aktos de krueldad, asasinado i diskriminasyon.

El Sekretario Jeneral de la Enformasion Publika de las Nasiones Unidas, Kiyo Akasaka, en empesando la seremonia, disho ke el tema de la komemorasion de este anyo es ‘Esperansa’. Segun Akasaka ‘Todos tenemos la esperansa ke las numerozas seremonias komemorativas en el mundo entero, vana enkurajar la unidad entre las personas. Tenemos la esperansa ke el mundo entero va rekoneser i va penar para aretar los masakres. Me esto kreendo ke el estudio del Holokosto tambien va ayudar a ansenyar a las personas sus derechos umanos’.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın