Las atakas teroristas i la vida Judiya en Mumbai

Las atakas teroristas i la vida Judiya en Mumbai

Noche de Mierkoles, sesenta mansevos teroristos entraron a Mumbai, en botas de mar unfladas, yevando bolsas yenas de armas. Los teroristos se dirijaron a mueve lugares diferentes, para ampesar sus atakas. Tirando armas, entraron a oteles, a una estasion de treno, a otros edifisios, i a una Kaza de Chabbad, ande mataron a todos los ke estavan ariento.

La fuente de estos teroristos es El Kaıda, en Pakistan. Su objektivo es de krear desekilibrio en la İndia porke la İndia esta en buenas relasiones kon İsrael i kon los paizes del oksidental. Oy, ay diez Kazas de Chabbat en la İndia, i kada diya miles de turistos İsraelianos estan viyajando a la İndia.

El Lunes ke pasimos, una seremonia tuvo lugar en la mas grande Sinagoga de Mumbai, Knesset Eliyahu, por las viktimas İsraelianas. Fonksionarios del Governo İsraeliano asistieron a  la seremonia.

Duspues de este dezastre, me kije ambezar sovre los Judios de İndia. Vos esto transferando lo ke topi en esta investigasion.

En un pais, ande mas de 30 000 judios biviyan, oy solo 5000 judios kedo. Los 4000 biven alrededor de Mumbai. Estos judios son desendientes de dos komunidades; Los Bagdadis i los Bene İsraelis. Los Bagdadis, munchos de los kualos, eran rikos komersiantes i empresarios (iş adamı), son vinidos de İrak, antes 250 anyos. La famiya Sasoon, ke izieron una fortuna de las fabrikas de algodon i ke son nombrados por ser filantropistos, son de estos Bagdadis. Los Bagdadis, ke eran mas de 5000 personas, bivyeron una vida buena, debasho del domino britaniko. Duspues de la İndependensia de la İndia, kaje todos emigraron a la İnglaterra i a İstael. Oy, a penas 200 Bagdadis biven en İsrael. Los Bagdadis ke kedaron en İsrael, son personas de edas. Eyos no keren emigrar a İsrael porke tienen una vida repozada en Mumbai.

Serka de 1000 Bagdadi mansevos biven en İsrael. La majorita de la komunidad de Mumbai son judios de Bene İsrael ke trasaron sus orijines a una barka, ke se sumerjio (batmak) en la kosta de Maharastra, en el 175AC. Segun la leyanda, la barka desho siete kuplos palestinianos judios en la kosta. Los Bene İsraelis, oy, avlan Marathi, se visten komo los indianos, komen arros i mangos, djugan cricket i se visten saris.

La emigrasion a İsrael emposo duspues del anyo 1948, i pujo en el anyo 1964, kuando el Governo İsraeliano aksepto los Bene İsraelis komo judios, duspues de siertas konversiones. Duspues del anyo 1970, la emigrasion de los vilajios pujo. Oy 55000-60000 Bene İsraelis biven en İsrael. Ma, en los anyos dalkavo, la emigrasion aminguo, por modo de las kondisiones ekonomikas.

Mezmo ke uvo una grande emigrasion a İsrael, los lideres de la komunidad judiya i las institusiones judias en la İndia, estan penando ke ayga una vida judiya aya. ORT (una organizasion enternasional judiya ke se topa en el mundo entero)vende kasher, challah, gayina, i prodaktos al orno. Estan dirijando un ‘’Sentro Komunitario Judiyo’’ de 500 membrios ke estan asistiendo a las klasas de ebreo i deTora; estan selebrando las fiestas; los mansevos estan baylando en las diskotekas de la komunidad; ay klobes por las kreaturas i klobes por los viejos. Estan dirijando, tambien, en el vilajio Thane, una klasa por kreaturas mas chikos de 13 anyos, ande kada semana 25 kreaturas estan asistiendo.

Joshua Kolet, el Rabino de la komunidad de Mumbai, esta diziendo ke en los anyos dalkavo, la populasion judiya se estuvo deplasando a los muevos vilajios (komo Thane), por esta razon las eskolas judiyas de ORT  no tienen munchos estudiantes judiyos. Estas eskolas se avieron en el anyo 1961. Akeyos anyos, todos los estudiantes eran judiyos. Dos eskolas sekondarias en Mumbai, ke davan klasas de ebreo i de Tora, inisiadas por dos donatores judiyos – Sir Jacob Sassoon i Sir Elly Kadoorie – oy, tienen solo un punyado de estudiantes judiyos.

Las Sinagogas no estan puediendo formar un Minyan kada Shabbat porke, aparte de los ke lavoran por la organizasion judiya, los otros judiyos ke lavoran afuera, no pueden deshar sus lavoros, ni en Shabbat i ni en las fiestas.

Ma la vida judiya en Mumbai deve de kontinuar porke dainda biven 5000 judios aya, i miles de turistos israelianos estan vijitando esta sivdad kada diya.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın