Obama i las relasyones entre Israel i Amerika

Obama i las relasyones entre Israel i Amerika

Keridos Lektores,

La semana ke pasimos, asisti a una konferansia sovre ‘’Ke va ser el kondakto de los Estados Unidos i del muevo Prezidente, Obama por İsrael’’. Vos kero dar un rezumen de lo ke me kedo en el tino, de esta konferansia.

 İsrael esta anturado de sus enemigos. Oy, ay una gerra ekonomika i politika kontra İsrael.

Deke estan los Amerikanos sustenando İsrael?

Antes de todo, por modo ke las valores sosyales (komo demokrasia) de las dos partes, son las mizmas. La demokrasia en un payis, es la mas emportante koza por la Amerika.

La segunda razon es el lobby judio en la Amerika. El lobby judio es el mas fuerte lobby en la Amerika. Las organizasiones judias son muncho mas mijor organizadas ke  las organizasiones Arabas. Los judios azen munchas ayudas finansiales por el bienestado de los Amerikanos.

Ma, allado de esto, el entereso nasional de los Amerikanos, es la mas emportante koza por el pueblo de los Estados Unidos. En munchas okaziones, por egzamplio, en las gerras entre İsrael i los payizes arabos, las fuersas de la Amerika forsaron İsrael a retirarse de la gerra, kuando se trato de los enteresos de los Amerikanos. Tambien, en munchos kavzos, los Estados Unidos se mesklo A los aferes enteriores de İsrael por sus proprios enteresos.

İsrael es la mas grande fuersa militaria en el Oriente Medio. En munchas situasiones, la prezensia de İsrael garda los enteresos de la Amerika, kon el enterkambio (exchange) del Servisio de İntelijensia.

Los Amerikanos, tambien, son efikases en periodas de kriza, en momentos kritikos en el Oriente Medio. Kuando la gerra puede ir a otras partes del mundo, los Amerikanos estan aya para interferir (mudahale etmek).

Los Estados Unidos es el primer payis ke rekonesio İsrael imediatamente duspues de la kreasion del Estado de İsrael. Los Amerikanos ya saven ke, en ayudando para ke İsrael se enfuerteska, eyos no vana pedrer nada de la parte Araba.

En esta eleksion, uvo una grande kompetensia entre los dos kandidatos en la Amerika. Kual es mas pro-İsrael?

İ los dos kandidatos dieron sus apoyo a İsrael. İsrael es el payis ke va estar allado de la Amerika, si una koza katastrofika ariva en el Oriente Medio.

Las ekspektasiones para Barack Obama estan muy altas i no muy realistas. A todos, les esta parisiendo ke Obama va solver todos los problemes imediatamente. Ma, una ekspektasion realista es ke, Obama va reushir a solver el konflikto Arabo-İsraeliano. El esta pensando ke, esto es muy emportante para reparar las relasiones rotas en el mundo entero.

El turizmo, tambien, es muy emportante en el Oriente Medio. Siguramente ke dingunos no vana kerer viyajar a un payis, ande ay siempre gerra.

Lo mas, oy, el problem de İran es uno de los mas grandes problemes en el mundo. Los Amerikanos ya saven ke İsrael puede djugar un grande rolo para solvar este problem.

Segun Obama, komo se puede rezolvar el problem del Oriente Medio?

Antes de todo, kuando las partes estan prontas en el Medio Oriente, los Amerikanos pueden vinir i ayudar para azer un akordo. La divizion de los Palestinianos esta difikultando İsrael a firmar un akordo.

İsrael esta diziendo: ‘’Damos mas tiempo. No mos agash presion’’. Obama puede entender esto, i por lo tanto, va azer esto. Kuando el konflikto entre los Palestinianos se va rezolvar, el va interferir.

Por eskapar, kualo es el mesaj ke Obama esta dando a İsrael?

Obama esta diziendo ‘’No agash nada. Mozotros estomos aki, i en kada koza ke vamos a azer, vamos a pensar a vuestro entereso’’.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın