La ekspozision de las sinagogas de la Turkiya en el Palasio de Topkapı

La ekspozision de las sinagogas de la Turkiya en el Palasio de Topkapı

Una ekspozision de fotografiyas de las Sinagogas de Turkiya tomo lugar en el Palasio de Topkapi en el mez de Oktober. Las fotografiyas tomadas por Devan Larvis, esta amostrando las kazas de orasion ke egzisten i ke un tiempo egzistiyan en la Turkiya. Oy, la Turkiya es el solo pais musulman ande bive la mas grande komunitad judiya.

Este projekto fue dirijado por el arshitekto Joel A. Zack. Kon el ayudo de la Fondasion Maurice Amado i la Fondasion Famiya Mitrani, en el anyo 1996, Zack voyajo 10.000 km en la Turkiya kon su ekipo de investigasion para dokumantar sukuenta sinagogas. Zack tomo 3.000 fotografias i munchos diagrames de las sinagogas. ‘’Eskojer solo sukuenta fotos entre tantas, para meter a la ekspozision fue muy difisil por mi’’ esta diziendo Zack, ‘’porke kada foto tiene su propria espesialidad’’.

Las sinagogas de la Turkiya tienen munchas kozas asemejantes. Antes de todo, la majorita de las sinagogas tienen una guerta delantre, ke sierve komo tranzision entre la ambiansa publika de la kaye, i la ambiansa privada de la sinagoga. Una parte de la guerta sierve komo entrada a la galeria de las mujeres. Otruna parte es rezervada komo un lugar para la Sukkah.

Los enteriores de las sinagogas tienen una ambiansa de rikeza, kon tapetes turkos, lamparas de plata, artikolos de tavla ekskavada, i objektos relijiozos brodados. El Ehal, ande la Torah es guadrada, i la Teva, el platformo ande la Torah se melda, de vista atira la atansion de todos, a la entrada a la sinagoga.

La majorita de las sinagogas tienen una kamareta chika, el Beit Midrash, ke sierve por las orasiones de kada diya. Las sinagogas konstruidas antes el dizimuevien siglo, son kamaretas de edifisios viejos. Las ke son konstruidas mas duspues, son mas grandes i tienen puertas monumantales, markadas kon semboles relijiozos judiyos.

El enterior de kada sinagoga, tiene un espri partikular, formado kon las ideas de las komunidades ke bivieron aya.

Por egzamplio, en la Sinagoga Ahrida, en Estambol, la Teva tiene la forma de una barka, konstruida en esta forma, para akodrar el vapor ke trusho los Sepharades de la Espanya.

La Sinagoga Yambol tomo el nombre de los Sepharades ke vinieron a Estambol, pasando de Yambol en Bulgaria. Mezmo el enterior de esta sinagoga, tiene una vizion de Yambol.

La menora de bronzo, en la Sinagoga Beit İsrael, en İzmir, tiene en medio, un posto koronado kon la estreya i la media luna, ke es el sembol tradisional del İslam i del Emperio Otomano.

Munchas sinagogas tienen formas asemejantes. Las de İzmir tienen la forma de un kare. La Teva se topa en medio. Este plano se topa en las sinagogas de munchas otras sivdades.

Las Sinagogas de Bursa tienen una Teva en medio, i una segunda Teva enriva la entrada, ke se empleya en los diyas de fiesta. La Sinagoga Mayor, en esta sivdad, fue konstruida en el diisejen siglo, por los Sepharadis ke vinieron de Mayorka i se enstalaron en esta sivdad.

En Gaziantep, en el sud de la Turkiya, ande segun la lejanda nasio Abraham, anyos antes egzistiya una grande komunidad. Oy, solo una partida del edifisio egziste.

En Kilis, serka la Siria, enriva las puertas de la Sinagoga ke no egziste mas, los biervos en ebreo dainda no se efasaron.

En Samsun, en Edirne, en Aydin, en İskenderun, en Sardis, en Manisa, i en munchas otras sivdades, dainda egziste las ruinas de munchas sinagogas.

Kada una de estas sinagogas, tiene su propria estoria de kontar. Su estoria es la estoria de las jenerasiones de famiyas judiyas, en las komunidades ke oy mas no egzisten. Antes de este siglo, en munchos paizes musulmanes, judios i musulmanes bivieron endjuntos, en pas. En la turbulansa del Oriente Medio de oy, es muy fasil de olvidar estos diyas de armoniya i de pas. Estas sinagogas son muy valorozas i deven de ser konservadas porke reprezentan la multi kultura de este paiz, i vana servir komo un rekordo del pasado, de un mundo de armoniya.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın