Pasharo Nasional Del Estado Judio

Pasharo Nasional Del Estado Judio

El pasharo nasional del Estado Judio fue elejido en una eleksion nasional ke kontinuo mas de sesh mezes, i ke fue dirijada por la Sosiedad de la Proteksion de la Natura. La abubiya (ibibik) gano esta eleksion, i el resultado fue deklarado por el Prezidente Shimon Peres.

 La abubiya ke es mensionada munchas vezes en las lejandas judias sovre el Rey Salomon i la Reyna de Saba, es un pasharo muy popular en Israel. Segun la lejanda, la abubiya es kapable de kortar piedras kon su piko (gaga). Mezmo si su piko se le rompe, la abubiya kontinua a kortar las piedras kon su kresta (ibik). Por esta razon, en ebreo, lo yaman ‘’du chifat’’ ke sinyifika ‘’dos pikos’’ en la lingua Arameo. Los judios de Etopia la yaman ‘’El Pasharo de Moshe’’ i se kreen ke la abubiya, un diya, los va yevar a Yerushalaim.

La abubiya no se espanta de las personas, ma kuando se siente en peligro, este pasharo kita una boz de chuflete i una agua se le vazya del puerpo.

El karakter amistozo de este pasharo, es el faktor ke lo izo ganar en estas eleksiones. Entre los arvoles, en la natura, de jenerasion en jenerasion, las abubiyas kaminaron, lado kon lado, kon las kreaturas Israelianas.

Komo Israel es situado entre tres kontinentes, kada anyo, 500 miliones de pasharos pasan de los sielos de Israel. Por esta razon, dizen ke Israel el el sentro de ‘’bird watching’’ en el mundo entero.

La abubiya fue elejida entre 540 jeneros de pasharos. En el empesijo, diez pasharos fueron elejidos, i la lista fue enkolgada en los parkes nasionales, en el Ramat Gan Safari, i en el Zoolijiko Bibliko en Yerushalaim. Miles de ijikos de eskola i miles de soldados, tomaron parte en las eleksiones. Las eleksiones kontinuaron tambien en los kuarenta ambasados i konsolatos en el mundo entero.

La abubiya resivio el 35 por sien de todos los votos. El rezultado de la eleksion fue anonsada por el Prezidente Shimon Peres. Segun Peres, la paloma deviya ser elejida en estas eleksiones. ‘’La paloma es un pasharo muy spesial’’ disho Shimon Peres, ‘’No emporta, ande se va, ke obstaklos rankontra en su kamino, a la fin, siempre torna a su kaza’’.

La idea de determinar un pasharo nasional fue kreada por el Doktor Yossi Leshem. En el sesentien aniversario del Estado Judio, Leshem kijo atirar la atansiion del puevlo judio sovre la Konservasion de la Natura.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın