El Fondador de Google: Sergey Brin

El Fondador de Google: Sergey Brin

Dos semanas antes, Sergey Brin, el fondador de Google, asistio a la konferansia ‘’Konfrontarse Kon El Futuro’’, del Prezidente Shimon Peres, en Israel. Mas duspues, Sergey vizito los ofisios de Google en Israel.

Nasido en Mosko, en el anyo 1973, Sergey Brin apartiene a una famiya judia. Su padre, Mikhail Brin, en su manseves, keriya estudiar fizika en la Universidadde Mosko, ma no fue akseptado a la Universidad, porke el Partido Komjunisto aviya enterdido los judios de estudiar en los departamentos de fizika.Mikhail Brin se desido de estudiar Matematika, i entro a los egzamenes de entrada de la Universidad, en las kamaretas apartadas por los estudiantes judios. Duspues ke tomo el PhD de la Universidadde Krokow, Mikhail Brin lavoro por la Ajensiade Planifikasion de la Politika Ekonomikade Rusia.

La madre de Sergey, Evengya, tambien, sufriyo del antisemitizmo en el mundo akademiko de Rusia. Eya lavoro en la laboratuar de investigasion del İnstituto de Gas i Petrolio de Rusia.

En el anyo 1977, la famiya Brin se desido de abandonar Rusia. Durante una konferansia internasional, Mikhail rankontro las oportunidades ke el Oksidente puediya ofrirles. En el anyo 1978, eyos aplikaron para tomar el permito de emigrasion. Komo rezultado, Mikhail fue ekspulzado de su lavoro i su mujer renonsio su lavoro. Su aplikasion fue akseptada en el anyo 1979. Un sierto tiempo duspues, Las puertas del bloko sovietiko fueron serradas a la emigrasion.

Kuando era chiko, Sergey asistio a la eskola judia en Rusia. Sergey disho ke el, no sufrio del antisemitizmo ma en Rusia, nunka no se sientio en su kaza. Kuando teniya onze anyos, Sergey izo su primer viaje kon su famiya a İsrael, i selebraron la fiesta de Pesah en un kibutz. Sergey kontinuo a azer esta tradision en California, en el ofisio de Google. Kada anyo, en Pesah, Google apareja un seder por sus empyegados.

Larry Page, el assosiado de Sergey tiene madre judia. Los dos amigos estudiaron la siensia de komputador i matematika en

la Universidad. Siendo

los fondadores de Google siete anyos antes, Brin i Page pionaron la forma de bushkar i topar enformasion sovre todo modo de sujeto.  ‘’Los Dos Google Mansevos’’, empleyando el biervo ‘’bushkeda’’, izieron una grande revolusion en la teknolojia, i reusheron a azer posivle lo ke era imposivle. Eyos pensaron ‘’grande’’ i avansaron ‘’presto’’. Kuando disheron ke vana deskargar (download) el İnternet entero a sus komputadores, los profesores dısheron ke estos dos mansevos son lokos.

Oy, Brin i Page, tienen mas muncho de 5.000 empiegados, muncha moneda efektiva, una grande infrastruktura enformatika ke les esta dando un grande avantaj sovre la majorita de sus kompetidores i una marka ‘’Google’’ ke es nombrada en el mundo entero.

Kon mas de mil miliones de dolares de ganansia al anyo, i un stok market de una valor mas grande de General Motors, Ford, Disney i Time Warner todos unidos endjustos, Google, oy, en munchos aspektos, esta reprezantando la ajenda de la teknolojia, en el mundo entero.

Del empesijo, Brin i Page adaptaron el prensipio de la moral i la etika. Nunka, no deterioraron este prensipio por mas muncha ganansia. Estos dos mansevos, adaptaron el motto ‘’No Seygaj Diavlo’’. La publisidad de armas i de alkohol fue siempre enterdido en Google.

Oy, Google empeso a kolaborar kon el sientifiko Craig Venter, sovre una baza de data de enformasion genetika, por ayudar a la medisina. Esta kolaborasion, Craig Venter la esta yamando ‘’La enterseksion de la teknolojia kon la salud’’.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın