Kuatro diferentes sujetos... Kuatro eskritas...

Linda Olmert en la Sinagoga Neve Shalom

Linda Olmert, una   de los miembros del Konsilio de la Administrasion de Yad Vashem,  El Muzeo de Holokosto, arivo a muestra sivdad por la komemorasion del Holokosto en la Sinagoga de Neve Shalom. Linda Olmert va dirijar la prezantasion ‘’Nightwords’’(Biervos de Denoche) ke se va produizir en la Sinagoga.

‘’Nightwords’’ es una leyanda judiya, la Agada del Holokosto, ke fue eskrita por dos elevos de filizofia de la Universidad Harvard, en el anyo 1970.

‘’Nightwords’’ va ser dramatizado por trentisesh diferentes personas kon el akopanimiento de bozes i efektos.

Linda Olmert, la ija de un survivor del Holokosto,  es enkargada komo la Direktrisa Stratejika en el Sentro ‘’El Turizmo de la Edukasion’’, en Israel.

“Karakare” (Kuadro Preto) - Filmos sovre el Holokosto

Mueve filmos sovre el Holokosto vana ser amostrados, en los sinemas de Machka, G-Mall, entre las datas 30 Avril i 3 Mayo.

Este anyo, los diyas de los filmos del Holokosto, vana ampesar kon el filmo ‘’El Voyaje de Nina’’, dirijado por Lena Einhorn. Este filmo gano los premios del ‘’Mijor Filmo’’ i el ‘’Mijor Senario’’ en Guldbagge 2006..

Esta aktividad aparejeda por los mansevos de muestra komunidad, tiene una grande valor. En akodrandomos del pasado i de las amarguras, puedemos evitar asemejante dezastres en el futuro.

Los mansevos estan eskojendo filmos sovre una unika tema, kada anyo. El tema de este anyo es ‘’El Sistematiko Historiko del Holokosto’’.

Los filmos ke se vana amostrar este anyo son; ‘The White Rose’; ‘Die Falsher’; ‘Spell Your Name’; ‘Europa, Europa’; ‘Mephisto’; ‘The Power of Good’; ‘Rosenstrass’; ‘Volevo Solo Vivere’.

La Selebrasion de un Pidion en la Sinagoga Neve Shalom

La semana ke pasimos, asistimos a la seremonia del Pidion de Moti Bardavit, ijo de Sheila-Heizi Bardavit, inyeto del selebre kardiologo Dr.Mordo Bardavit-Janet Bardavit i Zelda-Ziya Tarabulus. La seremonia se efektuo en la Sinagoga Neve Shalom, kon la partisipasion de muestro Grande Rabino, Rav Izak Haleva. El Grande Rabino, mos avlo de la alegriya de un nasimiento por la famiya. ‘’Los miembros de muestra komunidad se estan enviejesiendo de diya en diya’’ disho Rav Izak Haleva, ‘por esta razon, mos estomos alegrando kuando ay muevos nasimientos en muestra komunidad’.

Pidion Haben es una tradision muy vieja. Segun muestra ley, el primer ijo nasido, kale ke seyga redemido (rehinden kurtarmak), porke kada koza ke sale de la tripa de la madre apartiene al Kreador. Por esta razon, el padre del primer nasido, deve de pagar la valor de sinko shekeles a un Kohen, kuando el muevo nasido se aze de un mez. Ma el ijo de un Kohen i el ijo de la ija de un Kohen son eksento (muaf) de este akto.

El konsertio de Nino Varon i Cenk Rofe en la organizasion GKD

El segundo diya de Avril, las mujeres de GKD, organizaron un diya de muzika, kon la partisipasion de los muzikos, Nino Varon i Cenk Rofe. Duspues del konsierto, Ester Arditi, la Prezidente de la Seksion de las Mujeres, izo una konversasion kon los dos muzikos. El mansevo muziko Cenk Rofe, disho ke el esta suivando el kamino del selebre organizator i kompozitor Nino Varon. Nino Varon avlo de su amor por su famiya i su mujer, i les konto a las mujeres sus memorias kon las selebres muzikas. Nino Varon eskrivyo munchas kantikas a munchas selebres muzikas. A la fin de la konversasion. Nino Varon kanto kantikas de su muevo CD, ''Ninovari'', ke el aparejo por su mujer ke esta en Ganeden.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın