Kuatro diferentes sujetos... Kuatro eskritas...

Dora NİYEGO Judeo-Espanyol
16 Nisan 2008 Çarşamba

Seremonia por las muevas Sefer Toras en la Sinagoga Hemdat Israel de Kadıköy

El 13 de Avril, diya de Alhad, las muevas Sefer Toras aparejadas por

la Sinagoga Hemdat

Israel de Kadikoy, se enstalaron al Ehal Akodesh, kon una grande seremania. El 3 de September 1899, el diya de la inogurasion de

la Sinagoga Hemdat

Israel, el Grande Rabino de akeyos diyas, Moshe ha-Levi, enstalo al Ehal-ha Kodesh, las Sefer Toras ke se empleyaron fin oy.

Komo estos rulos del Viyejo Testamento, se izyeron muy viejos, los miembros de muestra Komunidad, se desidaron de dar a eskrivir una mueva Sefer Tora.Eskrivir el Viejo Testamento, o dar a eskrivir es muestra 613’na mitsva.

Beno Bicerano, Yusuf Levi, Nedim Kohen i Yusuf Kohen lavoraron endjuntos, para realizar esta mitsva.

Diya de Alhad, kon la partisipasion del Grande Rabino Izak Haleva i del Rav Leon Adoni, duspues de la orasion de demanyana,

la Sefer Tora

se enstalo al Ehal ha-Kodesh kon, una seremonia muy alegre. Todos kantando i baylando al entorno de

la Sefer Tora.

Felisitamos

la Komunita

de Kadikoy por este ermozo evenemiento, ke tomo lugar en

la Sinagoga

de Kadikoy, duspues de 109 anyos.

 

El Grande Rabino Sefarad de Israel, Rishon Letsion Rav Amar, vijito muestra sivdad

El Grande Rabino Rav Amor vino a muestra sivdad el 8 de Avril, dıya de Lunes. Noche de Lunes, asisto a la orasion en

la Sinagoga Neve

Shalom i dyo un deskorso a los asistentes. Noche de Martes, lo hospedimos en

la Sinagoga

de Gostepe/Caddebostan. El Grande Rbino aksentuo tres sujetos diferentes en su deskorso; la edukasion de las kreaturas, la fiesta de Pesah i la asimilasion.

Segun Rav Amar, no devemos de neglijar la edukasion de Torah a la kreaturas. Devemos de formarlos en kaza i en la organizasiones sovre el judaizmo, para protejarlos de la asimilasion.

Rav Amar mensiono tambien la fiesta de Pesah. En esta fiesta, se aze munchos aparejos en muestras kazas.Kada judiyo kale ke aplike las reglas de Pesah en sus kazas i tambien afuera de kaza. Pesah determina muestro anyo entero. En esta fiesta, mos aserkamos mas muncho al Dio i esta santidad (kutsallik) se reflekta en muestra famiya i en muestras kreaturas. Mos rankontramos kon una fraz enteresante en el Salmo (la parte de Teilim); ''Mi haham veyihmorelle veyitbonenu hasde Ashem'' (Ken es la persona erudita (bilge), ke apersive de las buendas del Dio). Kualo kere dizir esta fraz? Kada persona lavora, gana i reushe en la vida. El, pensa ke esto es su reushita. Ma esto no es djusto. El Dio determina muestra sanedad, muestras reushitas i muestra ganansia i es El, el ke mo las da. La ganansia i la reushita ke obtenemos de muestro lavoro, es el benefisio ke mos da el Dio. Lo devemos esto al Dio. Devemos de apersivirmos de esto i devemos de remersiar por esto, al Dio.

 

La produksion de Matsa en muestra sivdad

Este anyo la produksion de matsa se esta azyendo en muestra sivdad, debasho de la inspeksion del Rabbi Avraham Haim, ke vino de Israel.

Komo lo savesh, el anyo ke pasimos, fuimos ovligados de importar matsa del ajeno, por modo de las inkonveniensias de las makinas de matsa en muestra sivdad.

Este anyo, las makinas ke estavan desaregladas (bozuk), se repararon. Los dientes de las ruedas se akurtaron por ke la matsa se kozga presto i ke no seyga hamets. La matsa se esta azyendo otomatikamente sin meter manos. Vos konsejamos de merkar matsa nativa, porke la fabrika de arina se alimpyo kompletamente antes ke la produksion de la matsa ampese.

 

El korte de mez de Elie Perahya

El uno del mez Avril, diya de Martes, se izo el Korte de Mez de Eli Perahya, en la Sinagoga HemdatI srael de Kadikoy. Akel diya el Rabino Leon Adoni dyo un deskorso a los asistenyes de la Sinagogai mos avlo sovre Ei Perahya i su famiya.''Lo esto asemejando al ke esta en Ganeden, al Koen Gadolke aspero siete diyas delantre de la Mishka(Templo), por entrar aryento el ochen diya. Siete diyas semboliza la vida de la persona, i el ochen diya semboliza la separasion de esta vida. En estos siete diyas la persona se apareja i entra al mundo eterno kon su formasion, kon las bienfezensias ke izo, i kon sus servisios a la humanidad. Aparejate en este mundo i entra pronto al Ganeden! Esto era lo ke izo el ke esta en Ganeden. Meldar, lavorar i illuminar las personas.

El era ijo de un muy buen padre. Yaakov Perahya era una persona muy rekonosido.

Klara Perahya, el Dio ke le de vida es tambien ija de una famiya muy nomrada, la famiya Kasavi, ke eran atados a la Torah, i ke siempre aziyan bienfezensias. Estas dos famiyas fueron buenos egzamplios i, en engrandesiendo buenas kreaturas, amostraron komo de djente fueron’’.