Famillion: Muevo Sitio ke va Unifikar todos los Judios en el mundo

Oy, malorozamente, kedo muy pokas kozas ke unifikan las diferentes komunitades en el mundo.

Un punyado de Israelianos empesaron a lavorar para topar remedio para unifikar los judios. La Sosiedad Famillion en Israel, esta mirando a konstituir un grande arvole de famiya dijital, ke va unifikar todos los judios en el mundo. Este projekto, ke fue aparejado por Danny Rolls (un eksperto de komputador), ya esta kaje eskapado.

“Esta idea nasio ocho anyos antes, kuando mi mujer (investigatora en la seksion de siensia en el Instituto Weizman), me demando de obtener mis espesialidades jenetikas” esta dizyendo Danny Rolls. “Deviya de krear un arvole de famiya. Enduna me vino una idea al tino. El jenesisto tiene munchos arvoles de famiya en su kashon. Si unifikamos estos todos arvoles, puedemos unifikar los judios en el mundo entero.”

“Mos tomo sinko anyos para developar esta idea. Izimos investigasyones para ambezarmos komo manejar las sistemas de komputasion sovre las sistemas biolojikas.

A la fin, reushimos a krear un sitio en el Web en versiones Ebreo i Inglez (jworld.famillion.com) i (jworld.famillion.co.il). En este sitio, el ke kere puede konstituir su arvole de famiya. La teknolojia esta rekonosiendo las asemejansas entre los arvoles, i konosiendo las strukturas de las relasiones, los esta unifikando. Kada vez, topando diferentes relasiones entre famiyas, un grande montante de personas se estan unifikando.”

Rolls esta estimando ke ay 100000 famiyas judias en Israel, i 200000 famiyas en la Diaspora. Asta oy, este programa arivo a rejistrar 45000 arvoles de famiya, lo mas en Israel.

El programa ya empeso a entegrar las bazes de datos ke egzisten. Un investigator de famiya hasidik, Shlomo Goldstein, empeso a tomar parte en este projekto. Goldstein, aviya aparejado los arvoles de famiya de sienes de famiyas hasidik, empesando del 17. siglo. El, konekto estos arvoles kon los de Famillion. La entegrasion esta kaje eskapada.

Famillion se adreso a los fonksionarios de Yad Vashem, para introduizir en el projekto las bazes de datos de los judios pedridos en el Holokosto. “Yad Vashem, a las vezes, esta enkontrando los nombres de los mezmos prizonieros en sesh diferentes kampos, antes ke fueron asasinados. Los investigatores no estan puediendo determinar kon presizion, si estas son las mezmas personas” esta diziendo Rolls. “Mozotros puedemos ayudarles a topar la koneksion entre estas personas i a kompletar el kadro.”

Famillion esta, tambien, lavorando kon Beit Hatefutsoth en Tel Aviv. Beit Hatefutsoth va unir las bazes de datos de 3000 komunidades judias i 100000 nombres a las de Famillion.

Este projekto va tener grande koneksion kon la identidad i la istoria judia. Kada persona va pueder ambezarse sus raizes i la koneksion kon los otros judios.

Kuando va tener bastante bazes de datos, Famillion va pueder dar informasion, mezmo sovre los riskos medikos de la persona, aziendo la koneksion kon su jenetika istoria. Ansi, en topando koneksiones entre diferentes arvoles de famiya, se va pueder tomar prekosiones por todo modo de hazinuras.

Rolls espera ke Famillion se va konvertir a un “Familipedia”, ke va kontar la istoria del puevlo judio.

“Si las personas estan prontas a kompartir sus istorias de famiya kon el publiko, endjuntos vamos a reushir a krear el puevlo judio” esta diziendo Rolls.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın