Peryimos una persona muy Valoroza

Peryimos una persona muy Valoroza

Eskrivir sovre el kerido Elie Perahya es la mas grande onor, ma en mezmo tiempo, el mas difisil dover ke tengo esta semana.

No esto topando palavras para eksprimir muestra pena de piedrer un ombre tan valorozo. La memoria de Elie Perahya, va ser anrejistrada i nunka va ser efasada de la Komunidad Judiya de Estanbol, i de la luha por avansar La Lingua i La Kultura Sefaradi.

Elie Perahya nasio en el anyo 1913 en Haydarpasha, en el apartamento Lefter, ke es situado al lado de la vieja Eskola Alemana. Elie meldo las primeras tres klasas en la Eskola Primera de la Alliansa en Haydarpasha. Komo era un elevo muy bueno, los profesores lo transferaron a la Eskola Franseza Saint Louis, en el mezmo forburgo. Saltando la kuatrena klasa, Elie meldo la sinkena, seshena i sietena klasa, en esta eskola. Duspues ke eskapo la ochena, muevena i diezena klasa en la seksion de komersio en el Lise Saint Joseph de Kadikoy, Elie Perahya se echo a la vida. El lavoro en el ofisio de kontabilidad i komo konsejero sovre los negosios finansieros por munchos anyos.

En el anyo 1930, kuando teniya 17 anyos, Elie Perahya fondo la Seksion Literaria de la Asosiasion de los Mansevos Judiyos de Haydarpasha.

En su chikes, Elie Perahya se aviya ambezado a djugar el violon. En su manseves, kon unos kuantos amigos fondaron una orkestra i davan konseres en la asosiasion.. Munchas vezes, Elie dava resitales de violon en la tarasa de su kaza, al puevlo ke se arkojiyan en la kaye, para oyerlo. Elie, era tambien, admirador de la Muzika Turka. Aparte de los konseres de los mansevos djudios, munchas vezes, envitava dafuera Orkestras de la Muzika Turka a la asosiasion de los mansevos.

Un otro sujeto de entereso de Elie Perahya, en su manseves, era la Lingua Turka. Elie tomo lisyones para ambezarse la eskriturya del Turko Viejo. Estas letras viejas ke paresian al esteno, le ayudo a ambezarse el esteno, i , mas duspues, avyo kursos de esteno para los mansevos, en la asosiasion.

Elie Perahya era padre de tres kreaturas i marido de la respektavle Klara Perahya. El padre de Elie Perahya, Yaakov Perahya, kon el nono de Klara Perahya, Eliya Kasavi (ke morava tambien en Haydarpasha), fueron endjuntos los fondadores del Talmud Torah de Haydarpasha. Las famiyas Perahya i Kasavi eran tante onoravles famiyas de la Komunidad de Haydarpasha, ke la propriedad de la Sinagoga Hemdat Israel era ofisialamente anrejistrada a sus nombres.

Elie Perahya lavoro en munchas seksiones de la Komunidad Judiya de Estanbol. Entre los anyos 1936-1957, el lavoro en ovras de bienfezensia i tomo parte en diferentes aktividades del Opital Or-Ahaim. Entre los anyos 1974-1976, fue el Prezidente de la organizasion Fakirleri Koruma Dernegi, i del anyo 1957, fin el anyo 1988, Elie Perahya fue miembro del Konsejo del Grande Rabinato, i mas duspues, vice-prezidente del Grande Rabinato.

Elie Perahya teniya un arshivo imenso. El guadrava todo modo de dokumento emportante, pensando ke un diya puede valer a algunos. Veramente, no se trompo en su penserio. En el livro realizado por la memoria del sienten anyo del Opital Or-Ahaim, i en el livro del sienten anyo de la Komunidad de Haydarpasha, los dokumentos de los arshivos de Elie Perahya tuvieron muy grande valor por los investigatores.

Elie Perahya lavoro kon muncha voluntad, i konsakro su vida a aklarar el kamino de munchos mansevos kon su saverisio, su derechedad, su modestia i su amistad.

Elie Perahya i Klara Perahya partisiparon a munchos Enkontros Kulturales de la Lingua Judeo-Espanyol. Eyos tomaron parte en munchos projektos; marido i mujer kolaboraron en munchas ovras. Eyos realizaron endjuntos el ‘’Diksionario Francais-Judeo-Espanyol’’. Este kuplo amistozo, siempre fueron prontos a hospedar en sus kaza, los intelektuales ke vijitavan muestro pais. La amistad i la armonia entre los dos, formo siempre egzamplo a munchos kuplos kazados.

Elie Perahya eskrivyo munchas poezias a la memoria de las (un milyon i medio) kreaturas ke fueron matadas en la Shoah. Su poezia ‘’Los Sapatikos de los Bebikos’’mos aze yorar en meldandola.

Elie Perahya eskriviya kon su korason jenerozo. El mos transferava su saverisio, kon palavras dulses ke reflektavan su avla dulse. Mezmo en teniendo una aparansia serioza, su avla kalma, su riza dulse, i su intelekto profondo, ya abastava a atirar las personas.

Komo lo savesh todos, en la kolona ‘’La Huente’’de esta pajina, Elie Perahya mos transferava, kada semana, su filozofia kon las dichas de personas famozas, ke el traduizava al judeo-espanyol. El, siempre, eskojiya las dichas ke transferavan mesajes de pas, de amistad, de tolerensia, i de fraternidad.

Kreygo ke no abasta palavras para eskrivir el onoravle Elie Perahya i sus ovras. Su mujer, su kolaboratora, Klara Perahya va kontinuar su ovra kon fuersa i kon koraje por munchos anyos.

Ke su alma repoze en Ganeden.

Dora NİYEGO

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın