El Governo de Angleterra

El governo de Angleterra empeso a partisipar este anyo a los fondos del HET (Holocaust Educational Trust), para embiyar a Auschwitz, 4000 elevos de la onzena i dodjena klasa, para ke testimonen los horores del Holokosto.

La brancha de HET en Londra,  esta aparejando programas sovre el Holokosto en las eskolas, las universitades, i en las komunitades para elevar la konsiensia i el entendimiendo sovre el Holokosto.

Esta eksperiensia va ser una oportunidad unika por los elevos para ke veygan la realita kon sus ojos. Los elevos vana partisipar tambien a unos kuantos seminarios i testimonios de los sorviventes. Kuando vana tornar a sus eskolas i a sus komunitades, estos elevos son obligados de transferar los testimonios i las aktividades ke partisiparon en Auschwitz.

A las vezes, salir de la klasa i vijitar los lugares ande los evenemientos historikos pasaron, es la mijor manera de entender la magnitud (buyukluk) del evenemiento.

Las lisyones de Holokosto son muy emportante por las futures jenerasiones,  de manera ke puedan tomar prekosiones por otros jenosidios i krimenes (cinayet).

De esta manera, los elevos ke vijitaron Auschwitz,  vana tambien ensenyar los otros, sovre los peligros del predjuzmo i de la diskriminasion.

La ayuda del governo es un muevo paso en la edukasion del Holokosto. HET esta remersiando el governo inglez por su ayuda kontinual i esta ogurando ke los otros governos tambien agan la mezma koza.

Los Ministros del Governo Inglez dieron una mueva deklarasion, refutando (yalanlamak) el folso mail distribuado el anyo ke pasimos, diziendo ke las lisyones de Holokosto fueron eliminadas del programa de los estudios nasionales. Esta deklarasion del governo komprobo (ispatlamak) ke la edukasion del Holokosto es obligatoria en las eskolas de Angleterra.

Dos semanas antes los mansevos inglezes ke vijitaron Auschwitz en los anyos pasados, se reunieron en el Muzeo Imperial de Gerra en Londra ı  diskutaron sovre las prekosiones ke se deven de tomar porke el Holokosto nunka seyga olvidado.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın