La fiesta Tu Bishvat se selebro en la Sinagoga Hem

La fiesta Tu Bishvat se selebro en la Sinagoga Hem

Este anyo, komo kada anyo, diya de Alhad, la fiesta Tu Bishvat se selebro en la Sinagoga Hemdat Israel. Este anyo, por la primera vez, se izo una diferensia en el orden de asentar en la Sinagoga. Se metio mezas i siyas en la keilla i la djente se asentaron en el alredador de las mezas garnidas kon las frutas de Tu Bishvat.

El programa ampeso kon la demonstrasion de Barkovision ‘Kualo es Tu Bishvat?’.

En su diskorso Rav. Adoni mos ekspliko la sinyifikasion de esta fiesta. ‘Oy, muestra keilla se transformo a una guerta de frutas. Komo una famiya grande, oy estom aplikando la tradision de Tu Bishvat ke vamos a selebrar kon muestras famiyas, en muestras kazas amanyana la noche. Las frutas ke estomos komiendo, son las frutas de Eretz Israel. Kuando el Dio kreo Adam i Havva, los yevo a una guerta i les disho, para komer de estas frutas, emprimero kale ke vos ambezesh a azervos personas. Por esta razon, en Tu Bishvat, no se kome prodaktos de animales en esta meza divina. Las kreaturas paresen a los arvoles. Komo los arvoles, para ke se engrandeskan derechos kale kultivarlos, i a muestras kreaturas, para ke se engrandeskan derechas, kale ambezarles muestras fiestas i muestras tradisiones.’

Las kreaturas de Talmud Torah, una a una, resitaron la Beraha de kada fruta i mos kantaron kantikas de Tu Bishvat.

El Prezidente de Talmud Torah, Selim Azuz mos dyo la sinyifikasion de esta fiesta en kontandomos una estoria. Esta estorya mos amostro komo las frutas ke kedan atadas a los arvoles se kresen i kedan sanas. Tambien los mansevos ke son atados a la Torah i a muestras tradisiones kedan mas sanos i mas derechos.

El Prezidente de la Administrasion de las Sinagogas Hemdat Israel i Caddebostan, Mordo Kumrulukus, mos avlo del trokamiento de la nutura en Tu Bishvat. ‘No kale neglijar la edukasion de muestras kreaturas ke son la inversion de muestra komunidad’ aksentuo Kumrulukus en su deskorso.

El Prezidente de las Komunidades Robert Abudara, viendo el trokamiento en la keilla, mos avlo del dinamizmo de los djudios i sus voluntad a azer todo modo de novedades.

El Grande Rabeno Izak Haleva, mos adreso la palavra en dizyendo ke la Sinagoga es el mijor lugar de establisir el dialogo kon el Kreador, i tambien el dialogo entre los miembros de la komunidad.

La selebrasion de Tu Bishvat se eskapo kon la kantika Yerushalaim Shel Zaav, kantandola todos endjuntos kon grande entuziazmo.

Rogamos al Dio ke mos ayege a selebrar las fiestas, kada anyo, kon sanedad i alegriya.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın