La Prensa i la kriza en el Oriente Medyo

Klara PERAHYALa gerra Israel-Lebano, prevista al empesijo por unos kuantos dias, ainda kontinua ...Ainda en la prensa internasyonal: las mizmas verdades tresbokadas, vazias de senso, dichas a mitad ma ke azen la opinyon publika, eya munchas vezes syega i giada por la multitud de titolos de jornales eskritos kon letras de mas a mas grandes..Fue lo mezmo por la orrivle trajedia de “CANAN” (Kanan)... todos yorimos en vyendo puerpos inertos de ninyos, todos de leshos o d

Judeo-Espanyol
9 Ocak 2008 Çarşamba
Ma, sin tomar el  tyempo nesesaryo de bushkar a saver la verdadera realidad ,antes mizmo de djuzgar, grandes editoryalistos i politisyanos, syempre debasho una aparensya de falso umanizmo, se apresuraron de kondenar Israel i akuzarlo de krueldad, indo mizmo asta tratarlo de rejimen nazi.
Una kestyon vyene al tino:” En ke payis en gerra, los komandantes militaryos prevyenen antes de atakar?  Esto los Israelyanos lo izyeron. A  ken la falta si siviles, kriaturas, ombres i mujeres aedados  fueron deshados en lugares estratejikos?
A ken la kulpa si el materyal militaryo de ande parten los misiles ke vizan a destruir Haifa o Natanya, fue voluntaryamente instalado en kuartyeres rezidensyales populozos, en el solo eskopo de atakar sin ser atakados?
En vertud de kual prinsipyo de Justisya, sin mizmo asperar el rezultado de una enkuesta echa a este sujeto (la kuala orozamente se konkluo en favor de Israel)  se puede kondenar un payis en su lucha egzistensyal kontra un enemigo ke avyertamente, a boz alta, prekoniza su disparisyon de la karta jeografika?
A un jornalisto Fransez ke le demando sus sentimyentos delantre la destruisyon de sus iluzyones, “David  Chemla” Prezidente de la Asosyasyon SHALOM AHSHAV, grande partizano i “luchador irreduktivle” para el establesimyento de un Estado Palestinyano enteramente otonomo, respondyo en este senso:
 “So ainda konvensido (i esto desde 1967) de la nesesidad para Israel de salir de los “territoryos” afin ke un  Estado palestinyano pueda ver el dia. No ay otra alternativa. La mayoridad de las dos populasyones estan konvensidas de la koza, ma malorozamente en la absensya de un progreso en este senso, son los ekstremistos ke estan diktando sus voluntad.
 Penso ke Israel devria empesar de muevo las negosyasyones kon la Autoridad Palestinyana, de manera a disosyar este problema del  ke se esta desrolyando en el Lebano.
Aya se trata de una agresyon del Hersbollah ke el ya  avia aparejado de mucho antes en azyendo un amontonamyento de 12000 misiles. Es un fakto irrefutavle ke Israel deve absolutamente defender su  populasyon, la kuala bive desde mas de 3 semanas debasho las bombas”.
 İ mas leshos el adjusta:
“Deke avlan de krimen de gerra kuando Israel, en repuesta al lansamyento de misiles, se topa en el ovligo de bombardear a su torno? i deke no avlan nunka ansi kuando el Hezbollah manda voluntaryamente misiles sovre las sivdades Israelyanas? Si el buto es de ayudar las fuersas ke luchan por la paz, kale trokar la forma de este diskorso i no kondenar unilateralmente Israel.”
De su parte, Bernard Henry Levy toka al mizmo sujetos en su ultimo artikolo publikado en la revista el Point del 3 del mez koryente:
 “Delantre el odyozo espektakolo del karnaje de “Cana”, delantre la imejen insomportavle para la konsensya de estos puerpos de ninyos ke salen de debasho las ruvinas de sus kazas, eske es ainda posivle de rekordar  syertos faktos?
 1)Esta terrivle gerra lakuala, komo todas las gerras aktuales, chaptea siviles i kriaturas, Israel no la kijo. Es el Hezbollah ke la desidyo.Israel se travo de Gaza ay de esto 6lj mezes, i del Lebano ay 6 anyos .Su muevo governo era profundamente konvensido ke una de las primeras kozas a kumplir era de azer “no la gerra” ma “la Paz” i en este buto (primera vez en la Istorya de su payis) una de sus desizyones fue de amenguar los gastes militaryos.
 En este intervalo el Hezbollah  sin ningun konflikto territoryal ni ningun otro motivo de gerra, eskojo la data a la kuala devia arrekojerse el “G8” para impozar la gerra.
2) Kontraryamente a las formulas estereotipadas ke son repetidas asta dar enguyos, Israel no aze la gerra kontra el Lebano, el aze la gerra kontra un enemigo implakavle ke eskojo el Lebano para instalar sus misiles nombrados “Katioucha”, “ Qassame” i otros, en el buto de atakar i destruir su vezino.
La riposta de Israel es una riposta ke tyene komo eskopo de romper la makina de gerra ke lo kere destruir .......El viza solo los objektivos  militaryos del Hezbollah  los kualos fueron  plasados intensyonalmente en los kuartyeres populozos Libanezos.
Si, devemos yorar los muertos de Cana. Se deve enkuestar al sujeto del orijen de la falta, i es lo ke izo el Governo de  Yerushalayim”.....(fin de sitasyon)
Por seguro ke este problema sera rezolvido en poko , la prezensya de una rezya fuersa internasyonal va aplanar munchas kozas.. Puevlo korajozo ,  i konsyente de sus responsabilidades , puevlo imprenyado de los prinsipyos de baza del judaizmo ke son la justisya i el respekto del otro, Israel sin dubyo topara el kamino para azerse akseptar de sus vezinos en la paz i el avenimyento.