El 100’ten Aniversaryo de Leonard Bernstein se esta selebrando en el mundo entero kon mas de mil eventos

El 100’ten Aniversaryo de Leonard Bernstein se esta  selebrando en el mundo entero kon mas de mil eventos

Leonard Bernstein fue uno de los primeros konduktores nasidos en Los Estados Unidos ke resivieron grande fama en el mundo entero. Bernstein kompozo la partitura para el muzikal de Broadway, West Side Story.

Leonard Bernstein nasyo el 25 de Agusto del anyo 1918, en Massachusetts. Bernstein tuvo grande oportunidad de dirijir la Filarmonika de New York en el anyo 1943. Fue uno de los primeros direktores nasidos en Los Estados Unidos ke dirijaron grandes orkestras. Bernstein muryo a la edad de 72 anyos.

Su padre, Sam Bernstein, era un emigrante ruso ke era rabino en Ukranya. Kuando se enstalo a New York, su padre empeso a lavorar komo alimpyador de pishkados. Troko munchos echos. Finalmente, empeso un negosyo rantable distribuyando produktos de ermozura. Leonard entendyo ke en azyendo negosyo se gana moneda, i ke las “okupasyones” en el kampo de muzika i de arte puediyan ser solo para pasatiempo.

A la edad de diez anyos, Leonard toko el piano por la primera vez. Su tiya Klara se estava divorsando, i teniya menester un lugar para guadrar su piano. Leonard kijo ambezarse a djugar el piano, ma su padre no aksepto a pagar las lisyones. Leonard avanso un poko para pagar unas kuantas lisyones. Su padre viendo el talento de su ijo, en su bar mitzvah, le merko un piano.

Estudiando en Boston Latin School, Leonard konosyo su primera maestra de piano, Helen Coates, ke fue su mentora su vida entera. Despues ke se engrandesyo, Leonard entro a la Universidad de Harvard, ande estudyo teoriya muzikal. En el anyo1937, asistyo a un konserto de Boston Symphony, dirijido por Dmitri Mitropoulos. Bernstein sintyo grande entuziazmo de ver el konduktor de la orkestra dirijir la orkestra kon sus manos. Akel diya, Berntein se desido de azer la muzika el sentro de su vida.

Para enfortaleser sus talentes teknikos, paso un anyo en el Curtis Instituto de Muzika en Filadelfia. En el anyo1940, kuando teniya 22 anyos, el Sentro de Muzika de Berkshire en Tanglewood lo envito a unirse kon otros 300 estudiantes talentuozos, i muzikos profesionales para una performansa muzikal. Leonard fue uno de los sinko estudiantes akseptados a la master klasa.

Bernstein fue ofresido el posto de direktor asistente de la Filarmonika de New York. Por modo de la gerra, pokos muzikos aviyan kedado en New York. Un diya, el direktor de la orkestra se hazineyo. En el14 de Novembre del anyo 1943, lo yamaron a Bernstein, i le ordonaron de dirijir la orkestra akeya tadre. Tanto fue aplodisado ke New York Times publiko un artikolo en la priemera oja sovre el sukseso de Bernsein. Despues de akeya noche, Bernstein se konvertyo en un direktor respektado.

Del anyo 1945 al anyo 1947, Bernstein dirijo la orkestra del sentro de la sivdad de New York i fue envitado a munchas sivdades en los Estados Unidos, en la Evropa i en Israel para dirijir konsertos.

Este anyo, el 100’ten aniversario de Leonard Bernstein se va selebrar, en el 28 de Agusto en el mundo entero. El kompozitor, konduktor, edukator, aktivisto, ambasador kultural i umanitario va ser selebrado kon mas de mil eventos en los sinko kontinentes.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın