Shavuot I La Istorıa De Ruth

Shavuot I La  Istorıa De Ruth

La istoria de Ruth empesa kon una buena famiya judiya ke tienen un problema. a ambre en Bethlehem forsa Elimelech, su mujer, i sus dos ijos a fuyirsen de Bethlehem, i establesersen en Moab, en el este para pueder topar kualo de komer. En Moab, esta famiya biven diez anyos. Los ijos se kazan kon dos ijas de aya: Ruth i Orpah. Biven orozos por diez anyos.

Ma, malorozamente, Elimelech i sus dos ijos se mueren. Naomi i sus dos ermueras Ruth i Orpah, kedan sin maridos, i tienen menester de ayuda. Naomi se desida a tornar a Bethlehem. Naomi les roga a sus ermueras de kedarsen en Moab. Ophrah aksepta de kedarse en Moab. Ma Ruth no la desha a su esuegra sola, i aze un sakrifisio grande en deshando su dio, i akseptando el Dio de Israel. Naomi aksepta el sakrifisio de Ruth, i la desha akompanyarla. En Bethlehem, la vida esta difisil para las mujeres. Naomi se siente muy triste, i Ruth empesa a lavorar en los kampos, arekojiendo produktos. Aya, Ruth rankontra un mansevo riko ke se yama Boaz. Boaz se namora de Ruth, i empesa a azerle komplimentos.  Boaz tambien es pariente de Elimelech, marido de Naomi. Kuando Naomi oye avlar de Boaz, i le dizen ke Boaz es un mansevo muy bueno, eya aze un plano para ke Boaz se kaze kon Ruth. Ruth va irse a la kamareta de Boaz de noche en sekreto, i se va echarse en sus piezes. Ruth aze lo ke la esuegra le dize, i Boaz se siente muy kontente en viendo ke Ruth lo kere bien. Boaz le dize a Ruth ke se kere kazarse kon eya, ma Naomi tiene otro un pariente ke se kere kazarse kon Ruth, i Naomi le dyo palavra ke se la va dar a Ruth.

Boaz sale al kamino para avlar kon este mansevo. Todos estan asperando kon grande kuriozidad para ver kualo va ser la fin. Komo resultado, este pariente esta mas enteresado a merkar un terreno ke Naomi tiene, ma no esta muy enteresado a kazarse kon Ruth.

Ansi azen un akuerdo, el ombre dize ke se arepintio de kazarse kon Ruth. Agora Ruth i Boaz estan libres, i se pueden kazar. Las kampanas de boda empesan a sonar i todos estan kontentes.

Ruth i Boaz tienen un ijo. Naomi esta muy oroza de tener un inyeto. Las mujeres de la sivdad le dan el nombre Obed al bebe. Este bebe es el nono del Rey David.

La istoria de Ruth i Boaz es una muy ermoza istoria de amor, i de sakrifisio. Es una istoria ke amostra el poder del amor, el poder del sakrifisio, i de la obediensia. La istoria de Ruth se melda en Shavuot por munchas  razones. La primera razon es el movimiento fiziko ke estan aziendo en arekojiendo los produktos de la tierra. El empesijo del amor de Ruth i Boaz toma lugar en Shavuot en kultivando la tierra. La segunda razon es ‘arekojer el produkto’ en el sensio espiritual ke tiene lugar en la istoria. Esto se ve kuando Ruth aksepta a reunirse kon la Tora, i kon el Dio de Israel.

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın