Alüminyum Hurda Geri Dönüşüm

Peryimos a un otro Pilar de la Kultura Sefaradi: Selim Amado z”l

Peryimos a un otro Pilar de la Kultura Sefaradi: Selim Amado z”l

Unas kuantas semanas antes, estavamos avlando kon la kerida Rachel Bortnick en el Whatsapp i eya me disho ke estava muy preokupada sovre la salud de su ermano, el kerido Selim Amado. Estuvimos rogando para ke se aga bueno ama malorozamente peryimos a este ombre maraviyozo. El Dio ke le de pasensya a su famiya i a su ermana.

A Selim Amado lo konosi munchos munchos anyos antes, en los anyos ‘80, kuando mos aviyamos ido a Israel kon Los Pasharos Sefaradis i despues kon la piesa KULA ‘930. El siempre estava kon mozotros, aresivyendomos komo sus ermanos i mirando de fasilitar los problemas ke salian. No me puedo olvidar ke una vez, Izzet Bana i yo peryimos la boz porke kijimos entrar a la mar i despues kantar! Selim Amado era farmasien ekselente i el mos aparejo una solusion homeopatika para la boz. I komo una koza majika, la boz mos se retorno. Despues le rogimos ke mos aga mas para yevarlo atras a Estambol i siempre lo guadrimos komo una koza muy presioza.

Tengo tantos rekuerdos kon Selim Amado. Sus eskritas tan interesantes sovre diversos sujetos provaron ke el Judeo-Espanyol se puede utilizar para eskrivir sovre el tema ke uno kere. Su apoyo partikolar en todo lo ke azemos aki en Estambol para propajar muestra kultura, sus mesajes de enkorajamiento i sus buenas ideas lo izieron un pilar para ken teniamos ena konfiensa immensa.

Kerido Selim, nunka te olvidaremos i siempre tendras un lugar importante en muestros korasones. Ke tu alma repoze en Ganeden!

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın