Memorias de Pesah

Memorias de Pesah

Kuando se dize Pesah, la primera koza ke me viene al tino es las komidas de Pesah. Kada famiya tiene sus propios rekuerdos de komidas espesiales. Las komidas tienen el poder de transportarmos al pasado, a las okaziones espesiales, i a las fiestas.

Kuando era chika, dos tres semanas antes de Pesah, mi madre merkava kashas de guevos, paketos de matzas, i paketos de arina de Pesah. Los aparejos de Pesah empesavan duspues ke eskapava Purim. Mezmo la kantika dize ‘Purim Purim Purim lanu, Pesah Pesah en la mano’.

Duspues de las limpiezas pezgadas de kaza ke tomava munchos diyas, las mujeres se metiyan a empleyar lo ke se iva gizar por Pesah. Una semana antes de Pesah, se merkava kilos i kilos de espinaka, i de prasa. Lavar akel karar de espinaka, azerla kuantas aguas, kortar minudiko minudiko los kilos de prasa i eskaldarla, tomava oras i oras. Todo era a la mano. No teniyan los ustansiles de kozina de oy. Kuantos kilos de karne i de kodrero se merkava. Todo kaliya ke se gizara uno u dos dias antes de la fiesta porke no teniyan “deepfreeze”. El masapan, el dulse blanko lo aziyan en kaza. Los gatós de Pesah, el teshpishti, los guevos kochos, los birmuelikos, las fritadas de espinaka, los prasifuchis, las albondigas de prasa, las dolmas de tomat, de pipirushka i de kalavasa, los rulikos de espinaka i de berendjena, el kodrero, las patatas al orno. Kaliya artar toda la djente ke iva vinir akeya noche. Todos los parientes viniyan ande mozotros porke mi nona i mi nono moravan kon mozotros. Era de uzo ke los grandes resivan los chikos de la famiya. Nono, nona, madres, padres, ijos, ermanos, inyetos, sovrinos, primos, todos se arekojiyan en la mezma kaza.

Akel diya se kitava del almaryo los chinis i las kupas de fiesta. Se lavava i se enchuguava todo. El mantel blanko kolaladeyado se metiya enriva la meza. Todo se aparejava, i todo se tapava kon un tapon blanko. I ya esta todo pronto. Aryento la kaza aviya una golor de limpyeza i de komidas savrozas.

Ma antes ke la djente venga, kaliya ke mos lavemos todos, uno a uno, i ke mos vistamos vistidos muevos.

Noche de Pesah, todos viniyan kon buketos de rozas, u kon un kuti de masapan. Asperavamos ke los ombres tornen de la Sinagoga. Los mansevos no puediyan dizir ‘Esta noche no me kero ir a la Sinagoga’. Duspues ke todos los ombres vinieron, todos se asentavan al Seder, para dizir la Agada. Ya vos puedesh imajinar la djentorya i el bruyido. Ma kuando se meldava la Agada, no kaliya kitar ni un pi de la boka, sino muestro nono mos mirava del yan.

Todos endjuntos diziyamos la Agada, porke todos ya la saviyamos de kavesa. Kada dos puntos era ‘Se lavaran las manos…’, La kaldera i el djarro ya estavan prontos. ‘Dam, Tsefardea, Kinim, Arov, Dever, Shehin, Barad, Arbe, Hosheh, Makat Behorot’. ‘Ijikos, no miresh por aya’. I mozotros, los ijikos, miravamos kon kuriozita, para ver kualo estan echando del djarro aryento de la kaldera. Yo me akodro ke mi nono metiya unas kuantas matzas ariento de una tovaja, lo aziya komo un sako, me lo dava ke me lo meta al ombro, i me diziya ‘Metete esto al ombro, te vas mas presto a Yerushalayim’.

De muestra chikes, ya konosiyamos la sinyifikasion de Pesah, ke es ‘la salidura de Misrayim’, la endependensia del puevlo judio. Kada anyo, selebramos este evenimiento, ke paso miles de anyos antes. Komo meldamos en la Agada ‘En kada jenerasion, kada judiyo es ovligado de repetar lo mezmo, komo si fuera ke es el ke salyo de Misrayim’.

Kada anyo, komemos el pan ke no tuvo el tiempo de levdar, el haroset, i las yervas amargas untandolas al vinagre, por akodrarmos de la amargura de los pasajes de muestros ansestros. Al lado del korban Pesah, metemos un guevo kocho ke semboliza la fekondasion i la esperansa. Los kuatro vazos de vino sembolizan la libertad. Komemos la matza, la lechuga, kontando a los chikos las maraviyas ke izo el Dio, para kitarmos de Misrayim.Anyos antes, duspues de la Agada, i de la komida de Pesah, kon grande alegriya kantavamos las kantikas de Pesah, todos endjuntos: ‘Un Kavretiko’, i ‘Kualo es el Uno’.

Estos rekuerdos de muestra chikes, van a kedar en muestros ojos. Oy, mezmo ke lo estamos aziendo kon muncho mas livianes, i kon la ayuda de la teknolojiya, vamos a kontinuar a transmeter muestra erensya rika a muestros ijos, i a las jenerasiones vinideras.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın