Compass doganbaruh

El mirakolo de la media elektronika

Ay anyos ke azemos todo lo ke puedemos para ke el suplemento del Şalom, el Amaneser seya meldado por munchas personas. Desparte de los abonados del Şalom, kreo ke tenenos tresyentos o kuatrosyentos abonados solo para el Amaneser (personas ke no konosen el Turko - o ke no les enteresa de meldar el Şalom turko). La semana pasada kuando estava eskrivyendo mi artikolo vide en el WhatsApp ke unos kuantos miembros de muestro grupo keren ke kada dia eskrivamos uno o unos kuantos byervos kon un desen i las traduksyones en turko, en inglez i en espanyol puro. Despues ke eskrivyeron esto en una semana mas de dosyentas i sinkuenta personas se enteresaron i son agora miembros de este grupo ke se yama “Grupo Judeo-Espanyol” en Whatsapp. Mizmo si kada diya ay un o dos ke se salen del grupo, ay munchos mas ke keren tomar parte en el grupo. Reelmente fin agora no empleyimos bastante las medias elektronikas para propajar i para ensenyar muestra lingua ma esto vyendo ke si topamos el kamino djusto puedemos realizar maraviyas en este kampo. Muestros amigos Henri Çiprut i Emel Benbasat ke son mas mansevos de mozotros pensan de una manera diferente. I son mas armonyozos (uyumlu) kon la media elektronika. El Twitter, el WhatsApp, el Messenger, los messages mizmo los mailes son medias muy importantes para propajar muestra lingua.

Lo ke mos manka es mansevos ke pensan kon la media elektronika. Si mos vyenen a ayudarmos kreo ke puedemos azer un buen echo i munchos mansevos se van a enteresar kon muestra lingua.

Mizmo me vino al tino ke puedemos organizar una kompetisyon sovre la propagasyon de muestra lingua kon medios elektronikos ande puedemos mizmo dar un regalo material (para ödülü) para el primer i el segundo, mizmo el treser premio. Esto lo vamos a diskutir en la primera seduta.

Ya se ke esta mala novela va tomar lugar en la partida turka del Şalom. Ma devo de partajarla. Alhad la tadre un avion privado tornando de los Estados Arabos se kayo en las montanyas Persyanas (İran dağları). I malorozamente ocho ijikas mansevas i las tres responsavles de la konduksyon del avion murieron en este aksidente fatal. Malorozamente dos mansevas, Liana Kalma Hananel i Jasmin Baruh Seloni de muestra komunidad estavan entre eyas. Ke sus almas repozen en Ganeden!

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın