Beshalah

El puevlo djudyo salyo de Raamses i arivaron a Sukot. Estando en la sivdad de Sukot, les apronto el Kriyador de una manera milagroza komo dos pilares, uno de fuego i uno de nuve ke iva adelante de eyos. El pilar de fuego iva kon eyos la noche por arelumbrarlos i el de nuve iva el diya por amostrarles el kamino. El segundo diya de 16 Nisan, empeso a kaminar delantre el real el pilar de nuve i el puevlo se fueron detras de el, i pozo en un lugar nombrado “Etam” ke es en los kavos del dizyerto. De este lugar se pudian ir muy bueno a el monte de Sinay sin pasar por la mar Ruvya, tomando el kamino por la parte de Tsafon de esta mar. Pero el Dyo le enkomendo a Moshe Rabenu ke se tornaran atras de este kamino i ke apozen delantre de la sivdad Pitom en un lugar estrecho entre la mar Ruvya i la forterisa de esta sivdad del Ejipto i los djudyos izyeron ansi.

Arivando el este lugar se topa el puevlo de Israel en un estado muy perikolozo. Paro vyendo ke los djudyos tornaron a este lugar, penso ke estan mareyados en el kamino i no saven por onde ir i vinir, i olvidandose Paro de todos los males ke pasaron por su kavesa, se arepintyo de lo ke izo de deshar i a los djudyos de su tyerra i pedrer tantos esklavos. Arekoje una armada muy fuerte i va presigir a los djudyos i los alkansa en este lugar en el sejen diya ke salyeron de Mistrayim. El puevlo djudyo se topa en el mas grande dezespero i no save ke azer porke, tomar i gerrear kon una armada tan fuerte sin estar eyos aparejados para esto i kon famiyas, mujeres i kreaturas seria imposivle. Fuyir, esto tambien era imposivle, syendo de una parte teniyan la mar onda, i de otra parte el fonsado ejipsyano. Otros propozavan de mizurarsen kon los ejipsyanos sovre lo ke kere ke seya, otros pensaron de ovedeser a sus vyejos patrones i tornar atras a Mistrayim, a sus esklavaje.

El Todo Poderozo ya save lo ke aze i le dize a Moshe Rabenu ke diga a el puevlo djudyo ke no se espanten i ke empesen a kaminar sovra la mar. El Santo bendicho El le dize a Moshe Rabenu, “espande tu mano sovre la mar i partila, i ke kamine el puevlo djudyo por la mar komo si fuera tyerra.”

Moshe izo el komando de el Kriyador i kon un fuerte ayre ke aperejo el Kriyador, se seko la mar komo si fuere tyerra. Entraron los djudyos dientro la mar i pasaron por ayi myentres la noche entera kaminando komo se kamina por lo seko.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın