Nunka Te Olvides

Nunka Te Olvides

El 27 de Enero es un dia para rekordar los sesh miliones de judios, i miliones de otras minoritas (jitanos i diskapasitados) ke fueron asasinados por los nazis durante la Segunda Gerra Mondial.

El mundo los rekorda kada anyo el 27 de Enero. Este dia es nombrado komo el Dia del Olokosto.

600 kreaturas se salvaron de Auschwitz. Dainda tienen los numeros de identifikasion eskritos en sus brasos.

El jenosidio de Hitler, konosido komo Shoah en ebreo, elimino mas de los setenta i sinko por sien de la populasion judia de Evropa. Un milion i medio de kreaturas fueron asasinados en el Olokosto.

Estos asasinatos tuvieron lugar entre los anyos 1941 – 1945. Pokas viktimas pudieron sovrebivir los atakes. El ganador del Premio Nobel de la Pas, Elie Wiesel fue uno de los sovrebivientes.

El objektivo del Dia de Komemorasion del Olokosto es rekordar las atrosidades de la Segunda Gerra Mondial i garantizar ke estos orores del pasado no se repeten en el futuro.

Kada anyo, este dia tiene un tema kon una sinyifikasion para ke las atrosidades keden en la memoria i ke mos ambezemos del pasado. El tema de este este anyo es ‘Komo puede la vida kontinuar?’

Komo eksplikaron los organizadores de este evento: “Agora es ora de rekordar las miliones de personas ke fueron asasinadas. La vida de los sovrebivientes tambien troko por entero despues ke la gerra eskapo, porke eyos perdieron sus parientes durante los jenosidios’.

‘Este dia, los sovrebivientes mos kontan sus estorias para ke puedamos utilizar las lisyones de sus eksperiensas, i ke puedamos konstruir un futuro seguro porke si no, el jenosidio puede ampesar de muevo si la diskriminasion, el rasizmo i el odio no se kontrolan’.

‘Ni la diskriminasion, ni el rasizmo, ni la lingua del odio, eskaparon en el mundo. Dainda ay munchas kozas de azer para krear un futuro mas seguro. El Dia de la Komemorasion del Olokosto es una oportunidad para lavorar endjuntos, i evitar semejantes jenosidios en el futuro’.

Este dia es separado del Dia de la Rekordasion del Olokosto (YomHaShoah) ke tiene lugar en el mez de Avril o Mayo. Esta data, en en el anyo 1945, marko la liberasion del kampo de konsentrasion de Auschwitz-Birkenau en Polonya. Los sovietikos liberaron los prizonieros, ocho mezes antes de ke la gerra se eskape ofisialmente.

Kuando los sovietikos arivaron, la majorita de los prizoneros del kampo ya estavan embiyados a la marcha de la muerte.

Alrededor de 7.000 prisonieros aviyan kedado bivos, kuando se libero el kampo de konsentrasion.

En los sinko anyos ke el kampo estuvo avierto, 1.1 miliones de personas fueron asasinados en Auschwitz. Noventa por sien de los prizonieros eran judios. Las otras viktimas eran jitanos, polakos i sovietikos.

Uno de kada sesh judios ke murieron en la gerra, muryeron en Auschwitz.

En el anyo 2005, las Nasiones Unidas (UN) votaron para ampesar ofisialmente el Dia del Olokosto.

Kada anyo, mas de un milion de personas se van a Auschwitz para rekordar los ke murieron.

Akeya semana (23-29 de enero) se apareja miles de eventos i egzibisiones de komemorasion en Israel, i en otros paizes en la Evropa.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın