La leson de la fiesta de Sukot

Dora NİYEGO Judeo-Espanyol
11 Ekim 2017 Çarşamba

Ke es la leson ke la fiesta de Sukot mos da? Las personas se sienten en seguridad kuando biven en la komodidad de sus kazas. Kuando viene Sukot, salimos de las paredes de muestra kaza i mos asentamos debasho de las estreyas. Kada vez ke entramos en la suka, deklaramos muestra konfiensia en el Dio. Deshamos todas muestras uzansas, todo lo ke es muestro,  i bivimos una semana en la Suka. Deke azemos esto? Esto lo azemos para ke no seygamos arogantes (kibirli), i ke no mos pareska ke muestra alegria viene solo de muestras posesiones materiales. Kuando entramos a la suka, mos sintimos protejados en la prezensia del Dio.

 La prezensia del Dio es una seguridad verdadera. La rikeza, los premios, la teknolojía, todo lo deshamos en kaza. Todo lo ke konta en la vida esta aki, en muestra suka debasho del sielo avierto. Muestras famiyas, muestros keridos, el tiempo ke vamos a pasar endjuntos, todo esta entre las paredes de la suka.

La suka mos permete de transmeter esta kreensia a las jenerasiones muevas. Deshamos todo lo ke es material, i sintimos una alegria mas profonda. Realizamos ke mezmo si azemos esfuerzos mas duros para obtener mas munchas kozas para ser mas reushidos, no se puede garantizar nada en la vida.

En un mundo ande las kreaturas estan dezeando obtener mas, ande en lugar de pensar a los otros, todos estan pensando a si, Sukot mos da la oportunidad de konektar kon la espiritualidad, kon el Kreador, i kon la seguridad verdadera. Ansi, amostramos a muestras kreaturas, la alegria ke la persona toma da la espiritualidad.