Un viaje kon los keridos

Un viaje kon los keridos

Antes dos semanas mos fuimos a Kaş kon una partida de mi famiya para pasar kuatro dias endjuntos i para puedermos ver los unos kon los otros. Antes de kontarvos la ermozura de aki; kero darvos unos kuantos detalyos sovre la istorya de este distrikto (ilçe) ke es atado a la sivdad de Antalya.

Es un lugar ande moran 6.000 personas en invyerno, un lugar chiko, ermozo, djusto komo un kazal de l’Anatolia.

A la fin de la primera gerra mondial, Kaş entre los anyos 1919-1921 estuvo en la okupasyon (işgal) de los italianos. En esta perioda las bandas (çeteler) gregas ke vinyeron de la isla Meis ke se topa djusto en frente de este distrikto, atakaron Kaş i tomaron esklavos todos los dirijentes del publiko (kamu yöneticileri), i los yevaron a la isla Meis.

Meis es una isla ke apartyene a la Gresya, no ay muncha djente ke bive aya. La partida la mas grande de los moradores emigraron a la Australia; los ke kedaron los mas aedados, 400 personas ke avlan entre eyos en italyano.

Akel tyempo, lo mas de los moradores en Kaş eran gregos. Lo mas enteresante es ke en la isla Meis ke apartyene a la Gresya aviya una komunidad Musulmana. En el anyo 1923, la populasyon de Kaş se ampeso a trokar. Una partida de djente emigro aki i una otra partida vino de Selanik.

De un anyo al otro el mizmo chiko merkado (çarşı), la mizma plasa (meydan), los mizmos kafes kon djente todos riendo, los bares, el bodre de mar i todas las karakteristikas ke no trokan nunka. Lo mas emportante es, komparando kon Estambol, la fineza sovreumana (insanüstü) ekstraordinarya i el entendimyento (anlayış) sin limito. El aver limpyo, el klima es muy kayente en enverano, los invyernos son tivyos kon poka luvya.

En enverano ay muncho turizmo i los oteles, pansyones i moteles son yenos.

Un viyaje reushido para profitar de la mar, de demanyana fina la noche, de kaminar kon barka, de komer spesyalidades i de ver la ermozura, la trankilidad de la populasyon.

Kada demanyana despues del dezayuno estavamos azyendo un program diferente en indo a las plajes diferentes. La kolor de la mar estava empesando de blu klaro, vedre, blu mas fonse, tres kuatro kolores komo un arko de syelo. Los restoranes tipikos en las kalejas estrechas kon kazas de al tyempo chikas kon ventanas ke tyenen vidros chikos.

Djusto komo una isla grega, limpya i munchos magazenes para merkar regalos komo alikas i tumbalikas.

Las noches todos en las kayes, kafes i en los bares bevyendo i oyendo muzika.

A la fin de las vakansas tornimos a muestro nido kon alegria i kalmo.

El Dyo ke no mos kite el repozo i syempre puederemos tornar a muestra kaza sanos i rezyos kon guste i satisfaksyon.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın