Evenementos en Muestra Komunidad

Evenementos  en  Muestra Komunidad

En el enterval del mez ultimo uvo unos kuantos evenementos en muestra komunidad.

El mas emportante fue antes tres semanas el konserto ke dimos en Or Yom, el grupo ‘Nes’ formado por el shef İzzet Bana kon 16 mujeres de edades diferentes.

La muzika es el arte de kontar los pensamyentos i los sentimyentos de una manera monofonika (tek sesli) u polifonika (çok sesli). La muzika tyene dos elementos prensipales.

Sonido (ses) i movimyento (hareket).

En vezes kuando estamos tristes (üzüntülü) u inyervozos, kantar kon boz alta mos aflosha (gevşetir) i mos relaksa (rahatlatır).

La muzika es un arte (sanat) en mizmo tyempo la muzika es una sensya (bilim).

Tolstoy disho ke, “la muzika es la forma kurta de los sentimyentos”.

Victor Hugo disho: “La muzika ekspresa lo ke no se puede dizir i lo ke imposivle de kedar en silensyo”.

El sigundo evenemento tuvo lugar en la sinagoga majestuosa Neve Shalom, las Bat-Mitsvas de las 53 ijikas ke echaron paso a la manseves. Una djentorya inimajinable en Neve Shalom. Todas las ijikas vistidas kon fostanes blankos, i kon un buketo de rozas blankas en las manos, los padres kon vistidos pretos i una rosa blanka enriva la aldikera de la djaketas, djusto komo una boda…

Las novyizikas kon los padres entraron una de detras de la otra i todos tomaron sus lugares en el talamon.

Vista de ver!... Veramente muy sentimantal…

Aviya kaji 700 personas, las famiyas de las ijikas, amigas, amigos no aviya lugar de asentar. Las mujeres arriva asentadas en basho, malorosamente no se pudo ver la ermozura de la seremoniya.

El emportante es ke seygan mazalozas i venturozas i ke tengan las kalidades de la mujer djudiya.

El treser evenemento era el kokteyl de la Koloniya ke tuvo lugar el 02.07.2017 dia de alhad a las syete.

La Koloniya tyene komo dover de azer pasar un enverano yeno de kultura i de ambezamyento a las kriyaturas de 6 a 13 anyos. Es una misyon sakra ke se realiza kon una armada de volontaryos ombres komo mujeres, profesyonales i profesores sovre lingua etranjera komo el ingles, pintura, muzika, estatua (heykel), azer djoyas (takı), natasyon (yüzme) i munchas otras aktivitades para desveloparlos (geliştirmek) en todo modo de punto de vista.

Este anyo, 50 kriyaturas vinyeron para pasar el enverano en periodas (dönem) diferentes i para profitar del aver limpyo, de la mar, de la vida sosyal kon los otros.

En el enverano del anyo 1983, mi marido Meir Gaon (z”l) empeso a lavorar komo volontaryo en el tyempo del presidente Henri Ruso (z”l). H. Ruso teniya una personalidad ke enfluansava (etkilemek) al den frente. Era syempre korekto.

Su mujer Lote, abrasava kon sus ojos a todos los volontaryos i las volontaryas.

Hayim Marküs (z”l) era un ombre djusto, korekto ke mos ambezo a lavorar kon plazer, ke mos ambezo lo ke es la kerensya de las kriyaturas, ke las kriyaturas son el avenir de un puevlo.

Todos los tres mos ambezaron komo ser un umano, una persona komo kale, i la kerensya de las kriyaturas.

Munchos presidentes kon sus ekipas lavoraron anyos largos kon un esforso grande para enalteser el nivel de esta organizasyon i para ver los chikos orozos.

La famiya Sadioğlu reorganizo esta fragua, la modernizo kon sus donasyones.

Los aparejos fueron muy reushidos kon la ayuda da las volontaryas i plazyo a todos.

La avla del presidente Yasef Tovya sovre las kriyaturas, la istorya de la koloniya, sovre los volontaryos fue enteresante.

Kero terminar en nombrando a mi kerido marido Meir Gaon (z”l) ke antes dos anyos kuando izo la prezidensya de la koloniya, tanto kijo byen a las kriyaturas ke kompozo una poesia en djudeo-espanyol para eyos.

 

“La Kriatura Nase

La Kriatura Bive

La Kriatura Korye,

La Kriatura Salta

La Kriatura Kere Byen,

La Kriatur a Es El Avenir Tambyen”…

Meir GAON (2015)

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın