La Kuzina Israeliana

La Kuzina Israeliana

La kuzina israeliana es un portre del puevlo de Israel, i de la kultura de Israel. Shef kozineros, kozineros, agrikultores, fabrikantes de vino, i fabrikantes de kezo de mas de 100 kulturas, konstituan la kuzina israeliana. Esta multikultural kuzina se developo en los trenta anyos dalkavo. En este kurto tiempo, Israel empeso komo uno de los paizes los mas proves del mundo, i se izo uno de los paizes de los mas avansados. Sus komidas reflektan el estado aktual del puevlo israeliano de oy.

Egzaminaremos los populares platos de Israel:

1. FALAFEL

 Falafel, el rey de los platos israelianos, tiene orijin ejipsiano. Falafel es una delisioza meskla de garvansos, mesklados kon diferentes espesias. Estos boles ke se yaman falafel, se meten en una pita kon verduras, humus, salsa tahina, i en vezes kon patatas fritas.

Puedesh topar falafel kaje en kada kaleja, espesialmente en las kalejas las mas grandes. Los presios son muy baratos, komo 10-15 shekeles por una porsion. Falafel es una komida barata ke arta a la persona.

2. HUMUS

Humus es el prens de los platos israelienos. Este plato tiene orijin libanezo. Humus se unta enriva del pan. Humus es echo kon garvansos, mesklados kon salsa tahina, limon, azete de oliva, sal, i ajo.

Este plato se izo en un grande negosio en Israel. Humus se sierve en munchos kafes, i restoranes, tambien se puede merkar de kada supermarket. En los supermarketes, se topa una grande variedad de humus.

3. SHWARMA (DÖNER)

Puedesh topar shwarma en el mizmo lugar ke falafel se vende, o si no, muy serka de ande se vende falafel. Shwarma es otro popular plato de kaye de Israel. Shwarma es revanadas de pavo (hindi), de poyo, o de kodrero, kortadas vertikalmente (dikine). Shwarma es asemejante al stilo del kebab “döner” turko.

Shwarma se kome de la mizma manera de falafel. Se mete ariento de una pita kon salata, humus, salsa, tahina, pipinos, i patatas fritas. Esto todo se puede meter ariento de una lafa, ke es una pita del stilo irakiano. El presio es el mizmo de una porsion de falafel. Si merkas una lafa de Shwarma (ke es mas grande de la pita), pagas 30 shekeles. Si komes una lafa de shwarma, te artas mas muncho ke si komes humus o falafel.

4. JACHNUN

Jachnun es el rey de los platos de la fin de semana. Jachnun es un plato tradisional yemenita. En jeneral, se sierve solo en las demanyanas de Shabbat. Este plato se topa en munchos oteles, i restoranes en la semana entera. Jachnun se aze de una masa redonda, echa kon muncha margarina, i despues se koze noche entera por 10-12 oras.

La mijor manera de komer Jachnun es kon tomat rayada, un poko de schug, ke es pimienta yemenita (ke kema muncho la alguenga), endjuntos kon un guevo duro, ke se koze noche entera, kon la masa redonda.

5. SHAKSHUKA

 Shakshuka es un otro delisiozo plato israelieno, ke tambien tiene orijin del mundo arabo. Esta meskla de tomat, sevoya, ajo, i pimienta dulse, es una meskla agueyada ke se friye kon un guevo.

Si merkas shakshuka del kualsiker lugar, komo del grande Dr. Shakshooka en Yafo, puedes ver la meskla frita delantre de ti.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın