El poder de muestros pensamientos

Dora NİYEGO Judeo-Espanyol
24 Mayıs 2017 Çarşamba

Dr Masaru Emoto es un investigator japonezo ke gano fama mondial en amostrando komo la agua es konektada a muestra konsiensia.

Dr Emoto kijo entender si puedemos trokar la natura de la agua. Por provar (ispatlamak) esto, izo munchos eksperimentos. Emoto topo ke si djugas ermoza muzika allado de la agua, ermozas formasiones de kristal se forman en la agua.

Emoto izo un otro eksperimento kon la agua. Tomo dos kupas de agua. En kada kupa metio dos dedos de arroz, i dos dedos de agua. Enriva de un papel eskrivio el biervo ‘amor’, i lo apego enriva de la kupa. En un otro papel eskrivio el biervo ‘odio’ (nefret), i lo apego enriva de la kupa. Desho las kupas en un kanton por unos kuantos dias. Despues de unos kuantos dias, se fue para mirar si uvo un trokamiento en las aguas. En la kupa kon el biervo amor, ermozos kristales se formaron en la agua. La agua en la otra kupa se izo preta, i no uvo dingun otro trokamiento.

El Dr. Emoto deskuvrio ke ermozos pensamientos i bendisiones azen efektos pozitivos en la agua.

‘Yo ensenyo a la djente ke muestros pensamientos, emosiones, i aksiones trokan las enerjias en muestro puerpo i en muestro alrededor’ esta diziendo Dr. Emoto. ‘Pensamientos pozitivos, i yenos de alegria i emosiones kreen enerjias pozitivas en muestro puerpo, i en muestro ambians de vida (çevre). Kon pensamientos i emosiones negativas, embiyamos enerjias negativas a todos los lados. En pensando lo negro, la majorita de las personas estamos inchendo muestros puerpos kon negro, i estamos yamando lo ke no keremos en nuestras vidas. Los setenta i sinko por sien de muestro puerpo es agua. Vimos ke los pensamientos estan trokando la enerjia de la agua. Tambien, trokan muestro puerpo, i muestro alrededor. Ansi, sin kerer, kon muestros biervos i pensamientos, atiramos buenas o negras kozas en muestras vidas’.

‘Una vez ke entendimos esto, puedemos trokar la direksion de muestra vida. Puedemos ambezarmos a empleyar buenos biervos ke reflektan buenas entisiones, i ke travan enerjias pozitivas a muestro puerpo, a los objektos en muestro alrededor, i efektan la direksion de muestra vida. Puedemos bendizir todo, i ansi kon muestras buenas entisiones, embiyamos vibrasiones de enerjia pozitiva. Kon esto, puedemos trokar las enerjias negativas kon enerjias pozitivas. Puedemos ambezarmos a yamar las kozas ke keremos ke afiten en muestra vida, i no espantarmos de kozas negras.

El poder de las orasiones deve de ser esto. Kuando rogamos al Dio ke mos embiye kozas buenas en muestra vida, estamos yamando enerjia pozitiva. ‘Kita bueno de la boka’ diziyan muestras madres. Puede ser ke muestras madres, kon eksperiensia, ya se aviyan ambezado el poder de los biervos buenos.