Bamidbar

Despues de la salidura del Ejipto, i ke ya se kompleto el Tabarnaklo, (Mishkan) ya era el tyempo de formar a el puevlo ke fue 400 anyos esklavo komo un puevlo organizado, i tambien aunado.

Ke manera puediya de vinir un puevlo ke fue anyos esklavo a un puevlo endependyente? La demanda ke demando Paro a Moshe Rabenu en la salidura del Ejipto fue ken i ken vash a salir? La repuesta de Moshe Rabenu fue el puevlo entero. Nuestros mansevos i nuestros vyejos. Nuestros ijos i nuestras ijas. Kon estas palavras Moshe Rabenu kijo dizir nozotros semos un puevlo.

En la perasha ‘Bamidbar’, meldamos ke El Kriyador enkomenda a Moshe Rabenu de kontar la kuenta de el puevlo Djudyo. El sinyor de Rashi puja sovre este sujeto dizyendo: “De la estima ke tyene El Kriyador por el puevlo Djudyo, siempre kere saver la kuenta. Kuando salyeron de el Ejipto los konto, kuando muryeron en el pasaje de el bezero de oro por saver los ke kedaron los konto i kuando se termino el Tabernaklo i pozo su divindad sovre el puevlo los konto por saver la kuenta de el puevlo”.

Dizen nuestros savyos ke El Kriyador no kijo pozar su divinidad ni sovre las mares ni sovre las montanyas si no en el dizyerto de Sinay ke era el monte mas chiko, por embezarmos ke es muy emportante de ser umilde. I la veluntad de El Kriyador es de ser nozotros umildes komo un dizyerto, estonses la persona puede deprender La Tora.

Ansi eksplika el savyo Rav Hida de bendicha memorya, zehuto yagen alenu.

La dadiva ke se dava al santuvaryo medyo shekel sembolizava a la persona ke se konsidera ke el ainda es medyo deve de azer esforsos por kompletarse en el estudyo de La Tora, i en sus kualidades.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın