Lo ke mos esta asperando

Estos diyas estamos muy okupados kon las aktividades politikos en muestro payis i en el mundo. I malorozamente kon las personas ke son nasyonalistos o relijyozos estamos biviendo dias ke no vimos en muestra vida. El prezidente Amerikano ke es kazado kon una Slovaka i ke era kazado kon una Cheka (Çek) no kere ver imigrantes en su payis i este modo kere enalteser el nivel de vida de los amerikanos puros. No savemos si reelmente va pueder realizar esto kon su manera de komportamyento.

En la Fransia vamos a ver ken va ser el prezidente? Un kapitalisto, un sosyalisto o un/una nasyonalisto/ta. Kon los imigrantes ke estan en el payis el nasyonalista Marine Le Pen puedeser va ser kapache de kedar al segundo torno de las eleksyones para ser prezidente. Ya savemos ke entre los emigrantes, mizmo si son nasidos en Fransya, estan abandonando sus patria para ir a gerrear kon los islamistos en Siria o en Irak. Esperamos ke kon la situasyon ke se esta developando en Siria, en unos kuantos mezes vamos a ver ke los fanatikos de Ishid (ISIS) van a ser ekspulsados de este payis. Ma kreo ke el perikolo para mozotros turkanos es ke la mas grande partida de estos teroristos o asasinos para pueder bivir el solo remedyo ke tyenen malorozamente es de fuyir a la Turkiya. I esto va ser dert grande …

Ay un mez ke empesimos en Turkiya de muevo esta vez para un referandum, si keremos un prezidente o un primer ministro ke va dirijar el payis. El partido ke esta en el poder kere ke el prezidente de la republika seya prezidente kon muncho poder i el partido adversaryo kere ke la Turkiya sea dirijada kon su parlamento i kon el primer ministro ke va ser elijido kon la majorita del parlamento.

Esto todo son aktivitades ke no topan fin en muestro pais. Kada anyo tenemos una o doz eleksyones. Si no mos plaze los rezultados azemos una segunda eleksiyon.

Este anyo toda la Evropa van a elijir sus diridjentes. Savemos ke los Inglezes kijeron salvarsen de la Union Evropea, dospues vieron ke no va ser muy provechozo (faydalı) para el futuro de sus payis porke reelmente Londra oy en diya es la kapitala ekonomika de la Evropa i kon este komportamyento van a pyedrer munchas kozas en este kampo. I vemos ke elijeron una mujer poderoza komo Margaret Thatcher, Theresa May. Vamos a ver si va ser kapache o no para la prosperidad de la Inglatierra.

Oy en diya el pais el mas poderozo de la Evropa es la Almanya i en este payis vamos a ver unas eleksyones ande todos los partidos politikos van a emplear todas sus posibilidades para reushir. Ma la Shanselier Merkel kreo ke va reushir una otra vez para konservar su posto. Komo lo eskrivi este anyo reelmente vamos a ver munchos trokamyentos en la Evropa, en el Medio-Oryente i en el Mundo.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın