Al lugar de avlar por unos i otros, devemos de ambezarmos a avlar unos kon otros

Al lugar de avlar por unos i otros, devemos de ambezarmos  a avlar unos kon otros

Un ekipo de sinkuenta judios empesaron un projekto ‘Alkila un judio’ para evitar (engellemek) el antisemitizmo en Alemanya. Mascha Schmerling i Monty Aviel Zeev Ott son dos partisipantes de este ekipo, ‘Alkila un Judio’.

Kon una populasion de 100.000 judios, Alemanya es el solo pais en el mundo entero, ande la komunidad judia esta pujando kada dia. Munchos almanes dainda no konosen un judio. Este projekto tiene komo objetivo de ‘trokar’.

‘Kuantos de vozotros konosio un judio?’ Los partisipantes del ekipo demandaron esta kestion a los elevos de un kolej tekniko en Solingen, Almanya Oksidental. Los elevos de 15 a 20 anyos, dieron munchas repuestas diferentes. “Probablemente rankontri un judio, ma sin saver ke es judio’”, respondio un elevo.

Aki empesa el projekto ‘Alkila un judio’. “Nunka no te vas a olvidar tu primer rankontro”, dize la parola del projekto.

‘Ya savemos ke kuando dizes ke sos judio, este nombre puede evitar (engellemek) una konversasion mezmo antes ke empese”, disho Schmerling.

“Keremos dar a la djente la oportunidad de avlar kon la komunidad judia, keremos ke veygan ke somos djente kompletamente normal”, ekspliko Schmerling.

“No keremos ser konosidos solo kon la istoria, i no keremos ser vistos siempre kon el Olokosto”.

“Porke tambien keremos amostrar ke el judaizmo es avierto, i tiene munchas kolores’. ‘El judaizmo es tan diverso’.

‘Ma kon el antisemitizmo ke esta pujando de dia en dia en toda la Evropa oksidantal, la oportunidad de enkorajar la konversasion kon la komunidad judia se izo mas emportante en los mezes dalkavo’, disho Otto DW.

Los eventos antisemites en Berlin pujaron 34 por sien en el anyo 2015,  komparando al anyo 2014.

Este anyo, todos meldaron en las gazetas sovre el antisemitizmo en Almanya, kuando un ombre judio de 21 anyos, ke yevava una kipa, fue atakado por tres ombres.

‘Tu fuites atakado?’ demando un elevo a Ott.

Ott respondio ke el tambien fue atakado por modo de su kipa.

“Ay partes en Berlin ande no me meto kipa a la kavesa”, disho Ott. “La seguridad de la persona viene antes de todo en estas situasiones”.

‘Ma todo no es negro. Ay djente ke keren aserkarsen de mi, i keren avlar kon mi’.

“Me enkoraja de ver ke ay djente ke son aviertos”, disho Ott.

 Partisipar a los seminarios de ‘Alkila un judio’ da a los partisipantes de los seminarios, la oportunidad de ambezarsen el judaizmo, el tipo de orasion, las fiestas, la desendensia (soy), i el tema de los alimentos (yiyecek).

‘Kualo oyitesh sovre los judios?’ les demandaron Schmerling i Ott a los elevos.

“Edukados” respondio un elevo.

“No es una koza negra”, respondio Schmerling. “Ma, todos no son edukados’.

“Moneda”, disho un otro elevo.

“Esto es un viejo prejudizmo”, disho Schmerling.

‘No iva ser ermozo si vos davan una bolsa de moneda si vos azesh judios”, disho Ott.

‘Ande devo de afirmar?’ respondio un elevo.

‘El dialogo es la yave por todo modo de problema’.

Justin, de 17 anyos, era un elevo del Kolej Tekniko de Solingen. Antes de la vijita del ekipo ‘Alkila un judio’, Justin no tuvo la oportunidad de avlar kon uno de la komunidad judia de Almanya.

Los elevos Mohamed i Justin  estavan muy enteresados de ambezar mas, sovre el tipo de vida de un judio.

“No solo me ambezi sovre los judios, tambien me ambezi ke munchas kozas ke oyi sovre los judios no son verdad”, disho Justin.

Para Schmerling i Ott, destruir (yıkmak) los estereotipos es la mitad de una gerra ganada.

‘Al lugar de avlar por unos i otros, tenemos menester de ambezarmos a avlar unos kon otros’ disho Schmerling.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın