Evenementos emportantes en muestra komunidad

Evenementos emportantes  en muestra komunidad

La semana pasada fue la komemorasyon de Meir Gaon (z”l) kon Sami Herman (z”l) en una de muestras asosyasyones, organizada de una manera perfekta.

Asistimos a este dia kon muestras famiyas, kon muncho albon i muncha emosyon.

Deshar un nombre emportante despues la muerte es un orgolyo, es una satisfaksyon; ma murir sin tyempo, mansevo es una grande piedritad para los ke kedan de detras.

Enfin, el presidente troko la manera de komemorar i demando a los ke van a avlar de kontar solamente sus memoryas ermozas i no tristes, sus memoryas inolvidavles kon los ke se fueron al paradiso.

Tres, kuatro amigos intimos, senseros i amavles kontaron sus memoryas kon ‘Meir’, memoryas de sus manseves i despues del kazamyento.

Uno de eyos izo un dialogo kon Meir (z”l), komo ke estava avlando en Burgaz, en el bodre de la mar, de sus poezias, de la koloniya ande se topa 50 kriyaturas kada enverano, uno enfrente del otro, mirando la izla de Kuchara (Kaşık Adası), i bevyendo kafe, riyendo i topando solusyones por la sinagoga de Burgaz, ke era su primera kaza.

Fue un dia difisil i emosyonante para mi ke no me pude detenerme de yorar komo una kriza.

Despues, el presidente de muestra komunidad, İshak İbrahimzadeh, kon la jurnalista Karel Valansi avlaron sovre la situasyon de los djudyos en la Turkiya.

Karel demando demandas sovre la istorya, kuantos kedimos en Estambol, las bodas, los divorsos, los mansevos ke estan azyendo aliya a la Medina i a otros paizes, i İshak respondyo veramente de una manera djusta, los problemes del pais ande estamos bivyendo i otros sujetos…

A la nochada, asisti a la segunda komemorasyon en la Sinagoga Neve Shalom, por los ke peryeron la vida en el atako del anyo 2003.

Malorozamente d’en dia en dia estamos peryendo muestra apartenensya (aidiyet) a muestra komunidad.

Solo los ke estan ovligados estan vinyendo para la orasyon. Los mansevos, los grandes se estan aminguando de dia en dia. Los ke tyenen una relasyon; ke unos de sus famiyas fueron firidos u muertos, se estan sintyendo ovligados de asistir.

Pekado veramente pekado!...

Enfin, alhad ultimo, se fyesto el ‘Dia Evropeo de la Kultura Djudiya’ en Neve Shalom, de detras las puertas serradas a kavza de la seguridad.

650 partisipantes asistyeron a este dia enteresante yeno de evenementos. Lo ke es emportante es ke 600 asistyentes no eran djudyos, i esto mostra ke realizimos muestro buto. Los ke vinyeron toparon el program yeno de konosensya. De las onze de la demanyana fina las sesh i medya aviya en salones diferentes aktivitades diferentes.

El muzeo estava vijitado por todos; aki mansevos estavan partajando sus saveduria (bilgi) sovre todos los dokumentos, ekspozisyones (sergi), vistimyentas, fotos, konsertos, filmos i munchas otras kozas…

Mois Gabay fue el gia (rehber) de dos grupos de 40 personas sovre el paseo (gezi) de la rejyon de Galata, Şişhane ande moravan todos los djudyos antes 50 anyos. La Kula, las sinagogas, las eskaleras de Camondo, el Schneider Temple, los apartamentos sinyifikativos, i otros lugares…

Todos kontentes, tornaron a midi por gostar las spesyalidades del mupak sefaradi. Aviya armi, avas kon ispinaka, kashkarikas, köftes de prasa, borekas de berendjena i de patata, semola, i mas i mas todo savrozo ke munchas mujeres me demandaron la eksplikasyon de azer por egzempyo las köftes de prasa, ets…

El sujeto de este dia era ‘Las Linguas ke se estan Peryendo’.

El famozo eskrivano Mario Levi izo konoser su ultimo livro “Pandispanya” i sinyo su livro.

Los ke vinyeron se izyeron una nosyon sovre las tradisyones djudias, el djudeo-espanyol, la lingua de los sefaradis i el yidish, la lingua de los ashkenazis.

La avokata Rita Ender ke lavoro para realizar el filmo dokumentaryo (belgesel) ‘Las Ultimas Palavras’ se suivo kon grande entereso.

Anna Eskinazi konto la istorya de los djudyos en la Turkiya. El trokamyento de la lingua, las kavzas…

Lo mas enteresante era de ver la djentorya en la reprezantasyon de la boda djudiya, todos travando fotos.

El shef İzzet Bana kon la ‘Estreyikas d’Estambol’ i Cenk Rofe manyetizaron a la asistensya kon sus bozes de seda kantando kantikas maraviyozas.

Maraviyozos de ver este modo de boda, de vistimyentas, de tradisyones, chapeyos, la novya kon el padre entrando a la fin kon una novyizika i un novyiziko de sinko anyos kaminando delantre de eyos.

La aktivitad ‘Vini mos Konoseremos’, dio el mesaje de “mos engrandesimos en la mizma tyerra, i no somos diferentes unos de los otros”. Esta aktivitad fue enteresante para pueder demandar kestyones  sovre diversos sujetos.

Moris Levi, el Presidente del Museo ‘500.Yıl Vakfı Müzesi’;  lavoro de dia i de noche kon su ekipa, i reusheron a azer konoser a los ke no son djudyos las tradisyones i otras nosyones sovre los djudyos.

Los esto felisitando kon entuzyasmo en esperando la repetisyon de este dia en poko tyempo…

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın