Konoser de serka la famoza artista, Tilda rejwan

Dora NİYEGO Judeo-Espanyol
30 Kasım 2016 Çarşamba

Mi entrevista en turko kon la famoza artista israeliana Tilda Rejwan fue publikado en muestro periodiko Şalom, en el mez de julio del anyo 2015. Despues de este enkontro, kontinuimos a komunikarmos en el internet kon Tilda Rejwan. Mezmo la envitimos a Estanbol, para ke mos de un konserto en la Sinagoga Neve Şalom. Ma komo no teniya tiempo akel anyo, no pudo vinir.

El mez pasado, durante un viaje a Israel kon mi marido, Tilda Rejwan mos telefono al otel, i mos envito a mi marido, a mi i a mis amigos, al konserto ke iva dar en el salon de konserto en Rehovot, Tel Aviv.

Esta nuvela me kontento muncho,  porke keriya konoserla de serka, i oyer su boz ermoza. Tilda Rejwan mos kanto kantikas ke konosemos en judeo-espanyol, en turko, i en fransez. Empresiono todos los oyentes kon su ermoza boz, su eksitoza (başarılı) performansa en la sena, i sus movimientos sempatikos. La majorita de los oyentes eran Israelianos de orijin turko. Todos endjuntos kantaron kon eya, kon grande entuziazmo, las kantikas turkas, ‘Üsküdar’a Gider İken’, ‘Kızım Seni Ali’ye vereyim mi?’, i las kantikas viejas ke oyiyamos de muestras nonas, ‘Adio Kerida’, ‘Los Bilbilikos Kantan”, ‘Arvoles Yoran’ i tambien otras.

Durante el konserto, Tilda Rejwan disho: ’Una de las ekrivanas del periodiko Şalom de Estambol, Dora Niyego, esta kon mozotros esta noche’. Kon este ermozo djesto, Tilda Rejwan mos dio grande onor a mi, i a muestro periodiko Şalom.

Duspues del konserto vino allado de mozotros por konosermos, i travimos ermozas fotos endjuntos. El dia sigiente, me envito para ofreserme un kafe, ma malorozamente no pude akseptar su envitasion porke ivamos a partir a Estanbol fin dos dias.

Tilda Rejwan mos disho ke va vinir a Estanbol fin unos kuantos mezes, i ke probablemente van a dar un konserto en el Zorlu Center. Le dishe ke espero ke va dar tambien un konserto a muestra komunidad. Me izo muy grande plazer de konoser de serka esta sempatika, modesta, i amistoza artista.

Komo eskrivi en la entrevista ke ize kon Tilda Rejwan en el anyo 2015, Tilda es nasida en Estanbol, su chikes paso en Estanbol, el invierno moravan en Nişantaş, i en enverano se ivan a la kampanya a Suadiye. Fin onze anyos, meldo en la eskola Işık Lisesi. Kuando eskapo la eskola primera, se fue a la Suis por kontinuar sus estudios aya. Despues ke dio su Bakaloreya, se fue a la Fransia, i aya konosio su marido, Mishel. Se kazaron i se establesieron en la Fransia. Tilda eskrivio su primera kantika kuando teniya dodje anyos. Eskrivio muzika por munchas serias de televizion. Lavoro kon kreadores de muzika en muchos paises, kitaron endjuntos albumes de kantikas. Oy, Tilda Rejwan bive kon su famiya en Tel Aviv.

Rejwan avla siete linguas i kanta kantikas en estas linguas. Kuando le demandi, de ande se ambezo tantas linguas, me respondio ke avlavan en turko, en judeo-espanyol, i en arabo en su kaza. El franses, el ingles, el italiano i el ebreo se los ambezo en las eskolas, i durante los viajes a diversos paizes.

Tilda Rejwan dio munchos konsertos en las prinsipales sivdades komo Mosku, Roma, Paris, Brusel, New York. Me disho ke kere vinir a Estanbol, i dar konsertos aki.

Tilda Rejwan eskrivio la kantika final del famozo filmo ‘El Barbero de Siberia’. En la selebrasion del filmo en el Palasio del Kremlin, kanto la kantika final delantre de 5000 espektadores en Kremlin.. ‘Shirley Mclaine, el viejo  Primer Ministro ruso, Yevgeny Primakov, Viktor Chernomyrdin, i el Prezidente Mikhail Gorbachev estavan entre los espektadores akeya noche. Rejwan, en el anyo 2002, salyo a la shena, kon la Orkestra Sinfonika en el Palasio Kremlin en Mosku, i tambien salyo a la shena en San Petersburgo.

En Brusel, tomo parte en un bale en la selebrasion del sesentien aniversario del Rey Baudoin. En 2011, tomo parte en un show bazado en la vida de Dalida. Tilda tambien aparejo un album kon Arif Mardin i Ahmet Ertegun. En Haifa, kon la Orkestra Senfonika kanto las famozas kantikas en fransez en un show, ‘Istorias de Amor’. La selebrasion de este show se izo en la Kaza de la Opera, i izo grande sukseso.

En Israel, aparte de los konsertos ke da en las Salas de Muzika, tambien da konsertos en los parkes. En 2014, en la bienvenida del Prezidente Fransez, Ollande, a Israel, le kanto kantikas en fransez. Tambien dio konsertos en diferentes linguas a los envitados de Netanyahu en su kaza en Beit Ha Nasi en Yerushalaim. En 2013, empesando de Israel, repeto el show muzikal, ‘From East to West’, en munchos paizes Mediteraneos.

Estos son solo unos kuantos lavoros de Tilda Rejwan. Dezeyamos oyer esta sempatika artista tambien en los konsertos ke va dar un dia en Estanbol.