El İnvyerno

El İnvyerno

El invyerno es una sezon ke traye el pesimizmo para mi. El tyempo areskuro, las luvyas, la inyeve, el ayre yelado ke aze peryer el ekilibro de la persona i los dias ke se akurtesen kon las noches largas me apretan el korason.

El sol i la temperatura se amingua en esta sezon, las plantas (bitki) no se engrandesen, los animales emigran a las rejyones kayentes.

Mizmo ke es una sezon difisil, tyene i sus provechos (faydaları). Por egzempyo, la inyeve mata a los mikrobes. Las aguas de la inyeve ke se derriten inchen los barajes.

Esta sezon mos da la posibilidad del desvelopamyento personal, seyga en indo a los teatros, filmos, ekspozisyones, seyga en indo a los konsertos, a diferentes kursos de lingua u de pintura para pasar el tyempo en yeno.

A parte de esto todo, kale desvelopar las relasyones kon los amigos, aliados (dost) ke no se esta topando muy fasilmente.

Si una persona tyene sinko aliados komo los dedos de una mano deve de sintirse muy orozo.

Yo penso ke tener amigos buenos es una shans grande, ma no es la mizma koza kon aliados.

En el dor ke estamos bivyendo no ay malorozamente relasyones entre los vizinos por egzempyo. Mos estamos enkontrando en la puerta u en el asansor; no ay saludar o demandar komo estas!

En mi manseves los vizinos eran komo ermanos. Si teniyamos un problema todos koryiyan para akudir (yardım etmek) al den frente. Se biviya endjuntos, la ermandad entre los vizinos era valutoso.

La edad no teniya emportansa. Mansevas kon aedadas se pasavan komo madres i ijas.

Las fyestas se selebravan endjuntos kon las famiyas i vizinos. El amigable, la kerensya teniya una valor emportante.

En la epoka ke estamos bivyendo en el mundo entero, no esta muy fasil de bivir orozos i sin problemas, seyga por los mansevos, seyga por los aedados.

Estas avyendo la televizyon o la radyo; las novelas estan enserrando las alas del korason. La situasyon del pais ande estamos bivyendo no esta briyando.

Estas avlando kon amigos, no ay echos, la ekonomiya no esta buena, estan kitando munchos mansevos, porke ay una kriza ekonomika.

Los ke estan afuera del pais estan tornando atras, los ke estan aki se estan indo.

Todos, mas o menos estan pesimistos (kötümser) en pensando al futuro (gelecek), en todo modo de espasyo.

El estado psikolojiko (ruh hali) de munchas personas esta enfasyado.

Los psikologos estan dando emportansa a kuatro formulas de “Felisidad”(mutluluk):

Dar loores (şükretmek),

Estar sanos i rezyos (sağlıklı olmak),

Azer buendades i kerer byen el echo ke estas azyendo.

Dar loores: esta enaltesyendo (yükseltmek) la enerjiya de la persona, esta aminguando (azaltmak) la kanserya i las dolores (acılar).

Azer buendades: komo por egzempio vijitar un azilo de los aedados (yaşlı yurdu), ayudar a un vizino, eskrivir una letra a la granmama; esto todo esta azyendo pujar (arttırmak) la felisidad.

La felisidad es en primero la sanedad.

La felisidad esta en muestra mano.

Devemos de aminguar lo ke estamos asperando de la vida, arrepintirmos (vazgeçmek) de muestras ambisyones (hırs). Admeter (kabullenmek), akseptar todas las kozas negras ke vyenen a la kavesa de una persona, adaptarse a la situasyon mueva, para pueder kontinuar a bivir.

Lo mas emportante en la vida de una persona es la adaptasyon (uyum sağlama) a los evenementos muevos.

Kale azer munchos sakrifisyos (fedakârlık), rezistir a las difikultades (göğüs germek), i ser sezudos (olgun).

La kerensya (sevgi) es la felisidad (mutluluktur).

Para pueder bivir orozos, kale ser pozitivos (olumlu), bushkar a los paryentes i a los aliados (dost) akoruto (sık sık), aserkarmos de los ke keremos byen, tokarlos (dokunmak), abrasarlos (sarılmak).

Garez (kin), aborresimyento (nefret), enemistad (düşmanlık) i espanto (korku) son kozas ke kale estar leshos de eyas, porke aminguan la enerjiya de la persona.

Tener tolerensya (hoşgörü) i pardonar al den frente.

Ser onesto, (dürüst), djusto (adil), i derecho (doğru).

La baza de la felisitad es kontertarse (yetinmek) de poko i ser lo ke sosh (kendin olabilmek).

La armoniya kon la natura, la armoniya kon las personas aseguran la armoniya kon el mundo…

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın