Leh Leha

A

vraam Avinu sigun el orden de El Kriyador, tomo a Sara i a Lot, su sovrino i vinyeron a la tyerra de Kenaan. Estonses se deklaro unas diferensyas entre los pastores de Lot, sovrino de Avraam, kon los pastores de Avraam por kavza de la tyerra no abastesiya a mantener la muchidumbre de ganado, ovejas i kuatropeas ke teniyan entre eyos.

Avraam Avinu keryendo evitar ke no uvyera pletos entre el i su sovrino, le roga a Lot su sovrino de espartirse de el i irse a lugar ke le plaze mijor.

Lot izo lo ke disho Avraam Avinu, i eskojo la yanura de el Yarden ke es serka de las sivdades Sedom i Amora, i fue i se aresento ayi. Avraam se asenta en la tyera de Kenaan en Hevron en las yanuras de una persona nombrada Mamre. En akeos tyempos se deklaro una gerra entre los reyes de akeos lugares. Los reyes de Sedom i de Amora i otros tres reyes de una parte, i Kedorlaomer, rey de la sivdad de Elam i tres reyes kon el de otra parte.

La batalya fue vensida por Kedorlaomer i su partida, i tomaron todos los byenes de Sedom i Amora. I se yevaron tambien a Lot i a toda su azyenda.

Tuvyendo avizo Avraam Avinu, de este akontesimyento tomo kon el 318 personas de su desiplos i presigo a Kedorlaomer i sus komanyeros i los alkanso, i destruyo todo su fonsado, i rezgato a Lot su sovrino i toda su azyenda i a Sedom i a Amora i todas las personas ke fueron kativados.

Avraam se torno a su lugar, i Lot se fue a Sedom akompanyado de los reyes.

Estonses le dyo a saver El Kriyador a Avraam Avinu, kon profetiziya todo lo ke tyene ke pasar, su semen despues de tyempo, i ke tenian ke estar kativas en tyeras ajenas, i le prometyo a el i a su semen prometas grandes.

Syendo Avraam Avinu de 99 anyos, le komendo El Kriyador ke se sirkusyera el i Yismael su ijo, i todos los machos de su kaza. Esta enkomendansa de Mila deven de guadrarla su semen para syempre ke es un sinyal de aliansa i amistad ke izo El Kriyador a Avraam de darle un ijo de Sara su mujer despues de un anyo.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın