Las atakes de 6-7 September 1955

6 – 7 september 1955

Dora NİYEGO Judeo-Espanyol
7 Eylül 2016 Çarşamba

Los disturbos (karışıklık) del 6-7 September 1955, empesaron  en Pangaltı, ande esta oy  el Ramada Hotel. El edifisio viejo del otel era la propiedad de un grego. En 1955, los gregos lo mas bivian en estos lugares. La revuelta empeso kon atakar la pastelería Haylayf (ke apartenia a un grego) a las siete de la demanyana. Empesando de aki, los atakes se espandieron (genişlemek) a Beyoğlu, a Estambol entero, i a otras sivdades.

Segun la prensa, onze personas murieron en los atakes. Trenta personas fueron firidos, i munchas mujeres fueron violadas.

Kuatro mil i dozientas i katorze kazas, mil i kuatro magazenes, setenta i tres iglesias, una sinagoga, un monasterio, ventisesh eskolas, i otros sinko mil i trezientos i diisiete lugares komo oteles i bares fueron atakados. Echaron piedras a munchas otras sinagogas, i rompieron los vidros de las ventanas.

El danyo ekonomiko de los atakes fue muy grande. El governo del Partido Demokratiko pago serka de sesenta milyones de liras turkas (de oy) por las piedritas.

Los periodikos de la epoka echaron la kulpa a los gregos  diziendo ke avian provokado a los turkos. Ma, el sinkuenta i mueve por sien de los magazenes destruidos apartenia a los gregos, el diisiete por sien a los armenios, i el dodje por sien a los judios. Mezmo los lugares de los konversos fueron destruidos.

Kuando los atakes se espandieron, i salieron de kontrol, el primer ministro Adnan Menderes fue yamado de Sapanca, i se deklaro la ley marsial (sıkıyönetim). En el empesijo, tres mil sien i sinkuenta i uno disturbios (huzursuzluk yaratan insanlar) fueron detenidos. Mas duspues, este numero ogmanto (arttı) a sinko mil sien i kuatro personas.

Kuando iglesias i simenterios fueron atakados, fotografias, krusifikos, ikonas i otros objetos sagrados (kutsal) fueron destruidos. Las setenta i tres iglesias ortodoksas en Estambul fueron kemadas.

Mas despues, las razones de estos atakes fueron analizadas. La razon prinsipal de estos eventos se supsono ke era la kestion de Chipre (Kıbrıs). Ademas, el resultado de estos eventos fue la migrasion de miliones de gregos de Turkia a otros paizes. Estos eventos fueron los sinyales ke munchos turkos no estavan akeptando las minoridades komo sus sivdadinos (vatandaş).