La sovrebiviente del olokosto ke gano las mas munchas medalias olimpikas entre las mujeres judias en la istoria

Dora NİYEGO Judeo-Espanyol
31 Ağustos 2016 Çarşamba

Agnes Keleti nasio en Budapest en el anyo1921. Kuando era una kreatura de kuatro anyos, Agnes no se estava en un lugar, i aziya munchos movimientos de jimnastika en el Klub Judio de Budapest. Kuando teniya 16 anyos, ya era champion nasional. Ma kuando Alemania entro a Ungría en el anyo1944, la vida de Keleti troko, i fue ovligada de deshar la jimnastika.

El padre de Keleti fue embiyado a Auschwitz. Su madre i su ermana se eskondieron, i mas despues fueron salvadas por Raoul Wallenberg. Keleti tomo dokumentos de identidad kristianos i empeso a lavorar komo una mosa allado de una famiya ke le ayudaron muncho. Mas despues, lavoro en otros lavoros oribles de los  nazis.

Kuando eskapo la gerra, Keleti empeso de muevo a azer jimnastika kon una pasion grande. Eya partisipo en tres ekipos olimpikos de Ungaria, kompetio (yarıştı) en dos ekipos, i gano una reputasion ke kontinuo fina oy. Kuando teniya 35 anyos, partisipo en un ekipo de mansevas de vente anyos, i gano una medalya de oro mezmo siendo la mas vieja atleta del ekipo. Entre los anyos1952 i 1956, Keleti gano un total de diez medalyas olimpikas. Sinko de estas medalyas eran de oro.

En el anyo1957, Keleti emigro a Israel. En el mezmo anyo, un emisario israeliano la envito a partisipar en el sinken Djugo Makabeo. Akel anyo, Agnes se enstalo en Israel kon su madre i su ermana. Agnes empeso a lavorar komo entrenadora del ekipo nasional de jimnastika israeliano i komo profesora de edukasion fízika en el Instituto Wingate de Edukasion Fizika i de Sport. En Israel, la yamavan “la primera piedra de la jimnastika en Israel”.

En el anyo 1959, Agnes se kazo kon Robert Keleti Biro, un profesor de edukasion fízika de Ungria. Agnes i Robert se konosieron en Israel. Tuvieron dos ijos: Daniel i Rafael.

Oy Agnes tiene 95 anyos, i pasa su tiempo entre Israel i Budapest.