Ekev

“I no te afriyo, i no te izo tener ambre, i te izo komer man (magna) para azerte saver no bive de pan solo, si no ke toda palavra ke sale de la boka de El Kriyador bive el ombre”.

Estos versetos meldamos en la perasha ke meldamos esta semana. El kamino derecho de tener espanto de Dyos es de tener viguzya (esperansa) en El Kriyador sin ninguna ezitasyon. La persona ke no pense ke kon su pena i lavoro alkansa a el prosperidad si no ke es kon el ayudo de Dyos. En el Midrash konta: “Yermiyau el profeta demanda a el puevlo Djudyo deke no vos okupash kon el estudyo de la ley?” Les respondyeron a el profeta Yermiyau dizyendo; “Si nos entretenemos en el estudyo de la Tora, komo nos vamos a mantener?” Estonses les akodro a eyos la magna ke komyeron nuestros padres en el dizyerto kuarenta anyos dizyendo vuestros padres estudyaron la Tora i El Kriyador los mantuvo a eyos. I vozotros si tenesh la kreyansa ke El Kriyador mantyene a toda kriyansa no neglijaj el estudyo de la ley. El Kriyador tyene munchos mesajeros ke apareja el mantenimyento de sus keridos. El Kriyador kudya a los ke son atados a el Djudaismo a la ley, a los ke esperan sus mersedes.

La magna ke komyeron nuestros padres en el dizyerto era un milagro de los syelos.

La figuzya (Avtaha) es de tener la esperansa en El Kriyador. El Kriyador es la solombra de la persona komo meldamos en el livro de teilim Ad- Tsileha. La figuzya (Avtaha) la puedemos entender kon un egzempyo:

Una persona ke espera de su konpanyero ya lo save muy bueno ke el mantenimyento de su konpanyero esta dekolgado en el kon grande kudyo mira de no azerle mankar ninguna koza a su konpanyero.

No kere dicho ke el Sinyor del Mundo ke es fuerte de los fuertes, piadozo i grasyozo. El ke se apiada de la kriyansa dizde ke esta en la tripa de su madre. El poder esta solo en el. El konose i save la mankura de kada uno i uno. I la persona es ovligado de esperar solo de El Kriyador. La persona no deve de yerarse dizyendo: “kon mi fuersa i savidurya alkansi a la prosperidad”. David Ameleh en uno de sus salmos dize: “ABOTEAH B.Ad… HESED YESOVEVENU”. El ke se enfiguzya en El Kriyador mersedes buendades la aradean. No egziste otro kamino, si no de esperar en El Kriyador. Solo El Kriyador kumple los dezeos i las mankuras de la persona. I el poder esta solo i solo en su mano del Kriyador.

Es un dover sakro, por kada persona i persona de perkurar a alkansar a la avtaha (figuzya) ke es simyento de la Tora entera.

Si esperamos nuestro avenir de El Kriyador estonses alkansamos a el ayudo de Dyos. Komo esta dicho: Bendicho es akel ombre ke se enfiguzya en El Kriyador, i El Kriyador es su figuzya. Este verseto ke lo meldamos en la Birkat Amazon- Beraha de despues de komer. Kere dizir si la persona entriga su alma de esperar su egzistensya en El Kriyador, es muy siguro ke El Kriyador vas estar en su ayudo.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın