Vakansas i Demokrasiya

La semana pasada de viernes a alhad estava en Bodrum, kazal turistiko en la mar Egea ande en enverano se topa unos kuantos syen miles de personas ke se sienten entoksikados en las grandes sivdades komo Estanbol o Ankara, i ke topan la felisidad en el ayre, aver puro i mar limpia de este kazal. Trenta i ocho anyos antes, kuando me fui por la primera vez reelmente era un kazaliko ande siertos sivdadinos pasavan sus vakansas metiendonsen en los kaminos de tierra ande se puedia alkansar kon djibes o si empleavash arabas, teniyash siertos problemes porke los kaminos no eran  asfaltados (asfaltlanmamış yollar). En los primeros anyos de muestra republika, Bodrum era un kazal para los egzilados. Era un kazal reelmente ande moravan solo poka djente. Avia mizmo en la istoria, una komunidad djudia i Abraham Galante, el istoryano famozo ke eskrivyo todo lo ke topo sovre la istoria de los Djudios otomanos i turkanos era orijinario de Bodrum-Halikarnas.  Halikarnas es el nombre antiguo de este kazal. Deke estava aya i no partisipi al miting ke fue realizado en Estanbol – Yenikapı kon la partisipasyon de unos kuantos milyones de Estanbollis- siertos dizen ke avia sinko otros dizen ke avia dos miliones i medio de djente en esta manifestasion - ke pensan i se komportan de manera diferente. Aviya en este miting personas demokratikos i personas no tan demokratikos. El Gran Rabino Haleva, el prezidente de muestra komunidad, el Sinyor İbrahimzadeh i siertos miembros de muestra komunidad, mizmo muestro administrator del Şalom, İvo Molinas fueron prezentes. I devian de ser. Porke todos keremos el laisizmo i la demokrasia. Es djusto ke este modo de aktividades no son el simbolo de la laisidad ma devemos de achetar ke es el simbolo de la demokrasia; mizmo siertos partisipantes no son personas demokratikos mizmo son personas ekstremistos ke no konosen la demokrasia. Estava en Bodrum porke era el aniversario de mi inyeta Aria ke tiene un anyo. Ke koensidensya ke empeso a kaminar kon el arepushamiento de mi mujer Lika. Empeso a kaminar en Bodrum kon la prezensia de su nona i nono italyanos ke le avlan en italyano i ke toman la repuesta enternasyonalmente. Vamos a ver lo ke va ser en unos kuantos anyos. Va avlar en unas kuantas linguas o va tener problemas para avlar. Va pueder avlar en turko, en italyano, en inglez, en fransez i mizmo en judeo-espanyol. Si tiene un talente para las linguas, va azer todo lo posivle para ke entienda i para ke avle el djudezmo. Mi esfuegra konose i avla komo lingua de komunikasyon el djudezmo i le demandimos kon mi mujer ke avle kuando kere a muestro ijo en djudezmo ke tiene oy en diya kinze anyos. I reushimos porke oy entiende esta lingua kuando se avla. Es djusto ke no avla ma entiende una grande partida de lo ke avlamos. Mismo save munchas dichas i proverbos ke empleo kuando es el kavzo…

Esperamos komo sivdadinos turkos ke la demokrasia kontinue a enfloreser en los mezes i anyos venideros.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın