Un proyekto sovre Balat

Oy me telefono mi amigo Moris Levi para informarme sovre un proyekto ke esta realizando kon un fondo inglez para meter en valor la kultura ke se bivio en Balat el siglo pasado. Kualo era esta kultura i kualo era el puevlo ke bivia en Balat. La universidad kijo ke tomemos parte komo el Sentro Sefaradi en este proyekto. Kijeron ke ensenyaramosla lingua judeo-espanyola en la universidad de Kadir Has ke se topa en Djibali (sapatos d’Unkapan, chizmes de Djibali komo se kanta ....). Mizmo es esta universidad ke alkilo la eskola de la Aliansa en Hasköy ke era el Moshav Zekinim (İhtiyarlar Yurdu) i la estan empleando komo kaza para los elevos de la universidad.

Yo les propozi ke seamos partneres ma no solo para ensenyar el judeo-espanyol ma para toparles personas ke bivyeton en Balat. Ke bivieron kuando eran mansevos i kuando se fueron a la eskola, al kal i kuando bivyeron en este kuartier lo ke izieron, i ke modo se eglenearon? Reelmente este proyekto mos puede dar muncho material para determinar el modo de vida ke tenian muestros korelijionaryos (dindaşlarımız) en este kuartier.

No se si oy en diya ya egziste munchas kazas ke reelmente fueron kazas ande moravan los djudios i savemos oy en diya sus pasado. Ya savemos ke no moran mas en Balat ma ay unas kuantas botikas ande los patrones son djudios i siertos kafes ke fueron aviertos ande los patrones son siertos mansevos de muestra komunidad.

Ya savemos ke Fener era el kuartier de los Gregos i Balat de los Djudios. Konosemos los kales de Ahrida, Yanbol ke son dainda aviertos. El kal d’Istipol ke es un edifisio de tavla. Ya konosimos el Templo de Selaniko, de Çana i de Eliau ke se topan en la djadde. I si lo savesh serka de la iglesia Kariye ke oy en diya es una meshkita, aviya el kal de Kasturiya ke oy en diya malorozamente no mos apartiene.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın