Los artistos judios krearon los superheros

Dora NİYEGO Judeo-Espanyol
3 Ağustos 2016 Çarşamba

Los artistos judios krearon la majorita de los mas grandes heros komo Superman, Batman, Capitan America, Spider-Man i Hulk i otros. Esta lista kontinua sin fin.

El eskridor, Harry Brod, ke es un profesor de la Universidad del Norte de Iowa de la relijion i la filosofia, publiko un livro, ‘Komo superheros kontribuaron a la Verdad, i a la Justisia’.

Harry Brod, esta diziendo ke la eksperiensia de la emigrasion judia ayudo a konstruir estos superheros.

“En estos superheros estamos viendo los estereotipos judios ke los antisemitos se burlan: espantozos, sin fuersa, kon entojos, ma entelektuales. Estos karakterstikos los tiene Clark Kent, ke es el Superman.  Lo ke es sekreto es ke, debasho de estos karakteristikos ay un Superman.”

‘Los proves emigrantes judios de la Amerika keriyan krear un super imaj ke les iva dar la vida ke dezeyavan’.

El eskridor, en su livro, no esta diziendo ke estos personajes son judios ma ya esta viendo ke las ideas judias aparesen en los superheros.

“De otra parte, estos superheros estan karakterizando Mashiah, komo en el tradisional konsepto, ‘la edad de oro esta en el futuro’.

Los judios son enteresados a la siensia fiksion(bilim kurgu) i no la fantazia. Estos superheros son parte de la siensia fiksion’.

Brod esta diziendo ke los defektos de estos heros son tambien los defektos de los judios.

“Muestros personajes biblikos no son perfektos.  Para ser un hero no tienes menester de ser perfekto. Peter Parker, ke es el Spider-Man, es un sorvivor del Holokosto. El no puido salvar a su famiya’.

Brod no es la sola persona ke eskrivio sovre este sujeto. Danny Fingeroth,  en su livro ekspliko ke munchos judios mansevos kijeron krear un mundo idealizado, ande las personas vana ser juzgadas por sus karakter i no kon el prejudizmo. 

Fingeroth tambien penso ke el pensamiento de los antisemitos (ke los Judios estan kontrolando el mundo), enfluenso los kreadores de los super heros, para formar fuertes karakteres kon dos identidades.

‘La identidad sekreta de los superheros, en una forma, esta diziendo ‘somos puederozos, ma no para kontrolar el mundo, ma para azer buendad a otros’.

Arie Kaplan, eskridor del livro  “From Krakow to Krypton: Jews and Comic Books,”  tambien eskrivio sovre, komo el orijin judio de los kreadores enfluenso sus lavoro.  Por egzamplo, el nombre kriptoniano de Superman era “Kal El,” ke signifika “Todo lo ke Dio es” en ebreo.

Segun Douglas Walk, el judaizmo es reflektado en el lavoro de kada judio kreador, mezmo si no esta el konsiente en aziendolo. Esto es inevitavle (kaçınılmaz).