La Fiesta de los Padres

Keridos ijos, Desidi de eskrivirvos una letra i suetarvos i felisitarvos por la Fiesta de los Padres i nombrar a Viktor, vuestro padre.

Esti SAUL Judeo-Espanyol
16 Haziran 2021 Çarşamba

No mankavamos de konsiertos i festivales - la muzika siempre egzistio en muestra vida. Tuve la suerte, grasias al internet, de partisipar a Glastonbury Festival, Worthy Farm, Ingletierra:

WOLF ALICE - Kon su fostan blanko i su boz romantika, fue el primer grupo ke aparesio en un kampo imenso.

MICHEL KIWANUKA - Ke no konosia, enterpreto su kansion "Cold Little Heart" kon su gitara akustika. Tenia los ojos serrados.

GEORGE EZRA - Su kansion "BUDAPEST” me dio la impresion de mandarmos la luz de las estreyas. Me emosioni de oyirlo, akompanyado de su gitara tambien.

P. J. HARVEY – Kaminandomos, resito poemas.

KAE TEMPEST - Tambien i el kaminando entre los arvoles grandiozos, mos resito poemas.

IDLES – Mismo si no es mi preferensia el grupo "Punk Rock”, pude apresiar sus palavras: "Mi madre lavoro 16 oras, 17 oras, 20 oras". La verdad, la realita, mos toko al korason. Me konsentri a kerer entender: Es ke kijo revoltarse?

HAIM - Amo este grupo. En supito las ijas aparesieron, fotografiado por Paul Thomas ANDERSON, entre los penyaskos. Fue un klip enkantador i seduktor.

Me plaze de oyir las ijas ke mos konten muncho mas.

COLDPLAY - Chris Martin asemeja a un dia de enverano kon el sol briyando en los sielos. En el luzyo kampo, lugar de las vakas, kon la luvya ke empeso, el grupo se transformo. Paresian a los UFO's ke abasharon kon la luz, komo se konta en las fabulas. Chris Martin disho: “Es la primera vez ke do un konserto a miles de vakas...”

Malorozamente un konserto sin spektatores asemeja a un arvole sin sus ojas.

JORJA SMITH, kon su boz de seda, kantando debasho de un arvole, fueron djuntos kon GEORGE EZRA, los ke me seduziron en este festival.

Keridos ijos - Savesh ke mi hobi es de partajar las luzyores del arte.

Si puedesh azerme el plazer de viní Alhad, el 20 de Junio, para toparmos djuntos sin abrasarmos, al entorno de una meza en la terasa, para gostar los chufletes, el borek de kalavasa, ets., ke va preparar.

Para munchos anyos, kon los inyetos i la famiya i dias de alegria.

Siz de yorumunuzu yapın

Tüm Yorumları Görün